આદિપુરુષઃ રામ આવા ન હોય, રાવણ આવો ન હોય, રામાયણ આવી ન હોય!

રાવણ ખરાબ હતો, પણ તેને વાહિયાત વિલન જેવો પેશ ન કરી શકાય. તે જ્ઞાની હતો, શિવનો ભક્ત હતો. ૬૦૦ કરોડ રૂપિયાનો દાવો કરો છો તો તમે રિસર્ચમાં ધ્યાન આપો, સ્ક્રિપ્ટમાં ધ્યાન આપો. રામાયણ અને મહાભારત સાથે આખું હિન્દુસ્તાન વર્ષોથી સંકળાયેલું છે. તે માટે માર્કેટિંગથી વધુ પ્રમાણિકતાની જરૂર છે.

- પાર્થ દવે

અમુક કામો જવાબદારીભર્યાં હોય છે. તેમાં સમર્પણ તો જરૂરી છે, તે ન હોય તો વિવેકબુદ્ધિ અત્યંત જરૂરી છે. મનોરંજનક્ષેત્ર હોઈ લોકો મનોરંજન માટે જ ફિલ્મ, સિરિયલ અને વેબ-સિરીઝ જોવાનું પસંદ કરે છે, પણ તેમાં વિષય અનુસાર એક સ્તર પણ હોવું જોઈએ. તે વિવેકબુદ્ધિની વાત છે. તેના પરથી તમારું મૂલ્ય નક્કી થાય છે. ૧૯૮૭માં રામાનંદ સાગરે, હિન્દુ ધર્મના પ્રાચીન મહાકાવ્ય ‘રામાયણ’ અને ‘રામચરિત માનસ’ ઉપરથી ‘રામાયણ’ સિરિયલ બનાવી હતી. તેનું પ્રસારણ ડીડી નેશનલ ઉપર થયું હતું. તે વખતના અને તે એરા પછી જન્મેલા તમામ લોકોને આ સિરિયલના જાણીતા પ્રસંગો તથા એક-એક પાત્રો યાદ હશે. તે પાત્રો ભજવનાર કલાકારો પણ યાદ હશે.

આ ઇમ્પેક્ટ હતી, ‘રામાયણ'ની. ‘રામાયણ’ અને ‘મહાભારત’ હિન્દુસ્તાનની ગાથા છે. ‘રામાયણ'માં મર્યાદાપુરુષોત્તમ ભગવાન રામની વાત છે. સીતા તથા જ્ઞાની ’ને અહંકારી રાવણની વાત છે. તેને હિન્દુસ્તાનનો ઇતિહાસ પણ કહી શકો અને રામ વર્ષોથી પૂજાતા ભગવાન છે અને વર્ષો સુધી પૂજાતા રહેવાના છે.

ભારતીય સિનેમામાં અત્યાર સુધી ‘રામાયણ' ઉપર જુદી-જુદી ભાષામાં ૫૦ જેટલી ફિલ્મો બની ચૂકી છે. જેપનિઝ પ્રોડક્શન હાઉસે, ભારત સાથે મળીને રામાયણ: ધ લેજન્ડ ઓફ પ્રિન્સ રામા નામની સ-રસ એનિમિટેડ ફિલ્મ બનાવી હતી.

હવે આ ડાયલોગ વાંચોઃ ‘તેલ તેરે બાપ કા. કપડાં તેરે બાપ કા. ઔર જલેગી ભી તેરે બાપ કી.’

‘બોલ દિયા, જો હમારી બહનોં કો હાથ લગાયેંગે, ઉનકી લંકા લગા દેંગે.’