G20: ભારતની વૈશ્વિક ક્ષમતા અને ભવ્યતા દર્શાવવાની તક..

G20નો ઉદ્દેશ્ય વિશ્વભરના વિકસિત દેશો અને ઊભરતી અર્થવ્યવસ્થાઓ વચ્ચે એક સમન્વય સાધવાનો છે

વૈશ્વિક જીડીપીના ૮૫ ટકા, આંતરરાષ્ટ્રીય વેપારના ૭૫ ટકા અને વિશ્વની બે તૃતીયાંશ વસ્તીનું પ્રતિનિધિત્વ કરતા ૧૯ દેશો તેમ જ યુરોપિયન યુનિયનના સભ્ય દેશો વર્તમાનમાં ભારતમાં G20ની બેઠકોમાં સામેલ થઈ રહ્યા છે. વિશ્વની પાંચમી સૌથી મોટી અર્થવ્યવસ્થા એવા ભારતમાં અત્યારે માનનીય વડાપ્રધાન શ્રી નરેન્દ્ર મોદીના નેતૃત્વ હેઠળ G20ની બેઠકોનું સફળતાપૂર્વક આયોજન થઈ રહ્યું છે.

G20નો ઉદ્દેશ્ય વિશ્વભરના વિકસિત દેશો અને ઊભરતી અર્થવ્યવસ્થાઓ વચ્ચે એક સમન્વય સાધવાનો છે. જેથી સાથે મળીને તેઓ એ લક્ષ્યાંકો પ્રાપ્ત કરવા કામગીરી કરી શકે, જેનાથી દેશમાં આર્થિક સમૃદ્ધિ અને માનવ જીવનની ઉન્નતિ સુરક્ષિત થઈ શકે. અત્યારે G20માં ભારત, આર્જેન્ટિના, ઓસ્ટ્રેલિયા, બ્રાઝિલ, કેનેડા, ચીન, ફ્રાન્સ, ર્મની, ઇન્ડોનેશિયા, ઇટલી, જાપાન, રિપબ્લિક ઓફ કોરિયા, મેક્સિકો, રશિયા, સાઉદી અરેબિયા, સાઉથ આફ્રિકા, તુર્કી, યુકે, યુએસએ અને યુરોપિયન યુનિયન સામેલ છે. ભારતને એવા સમયે G20નું અધ્યક્ષપદ મળ્યું છે જ્યારે દેશમાં આઝાદીનો અમૃત મહોત્સવ ચાલી રહ્યો છે અને વૈશ્વિક સ્તરે ભારત તેના મજબૂત નેતૃત્વથી એક ગ્લોબલ લીડર તરીકે ઊભરી રહ્યું છે.