વેગનર ગ્રૂપના ભેદભરમ અને વિશ્વસત્તાની અસ્થિર ધરી

રેસ્ટોરાં અને કૅટરિંગનો ધંધો કરી ચૂકેલા, યેવર્ગની પ્રિગોઝિનના મૂળ અપરાધ જગતમાં ખૂંપેલા હોવાનું કહેવાય છે અને એ ક્ષેત્રનો અનુભવ તથા સંપર્કો વડે તેણે વેગનર સૈન્યદળ ઊભું કર્યું હોવું જોઈએ

- સ્પર્શ હાર્દિક

વિશ્વનો નકશો સામે હોય ત્યારે એક સળંગ નજરે જોઈને સમજવું સરળ પડે કે કયો ખંડ કે દેશ ક્યાં છે. કાગળ કે સ્ક્રીન કે ગ્લોબ પર અંકિત નકશો જોઈને મહત્તમ મનુષ્યોને અંદાજો પણ ન આવે કે એમાં દર્શાવેલી ભૂગોળ ખરેખર કેટલી જટિલ છે અને એ નિર્જીવ નકશામાં પકડાતું નથી એવું ઘણું પ્રત્યેક ક્ષણે વિશ્વના કોઈ ને કોઈ હિસ્સામાં સળગી રહ્યું છે. નજીકના અતીતમાં અમેરિકાઅફઘાનિસ્તાન-મિડલ ઇસ્ટ અથવા હાલના રશિયા-યુક્રેનને સાંકળતાં યુદ્ધનો સમાચારથી જ યુદ્ધનો સ્પષ્ટ આકાર પરખાય એવું લાગે, પરંતુ હકીકત એ છે કે વિશ્વમાં અવિરત ક્યાંક ને ક્યાંય યુદ્ધ તો ચાલતું જ રહે છે, જેના સમાચાર મૅજોરિટી માનવો સુધી નથી પહોંચી શકતા. રશિયામાં ખાનગી સૈન્યદળ વેગનરના પ્રમુખ, પુતિનના એક સમયના વિશ્વાસુ યેવર્ગની પ્રિગોઝિનના બળવાથી ત્યાં ગૃહયુદ્ધની સ્થિતિના ભણકારા વાગી રહ્યા છે ત્યારે મેઇન સ્ટ્રીમમાં વેગનર ગ્રૂપ વિશે વિગતો વહેવા લાગી છે.