રેતીમાં સૌંદર્યના પ્રાણ પૂરતા રેતશિલ્પકાર: નથુભાઈ ગરચર

ચહેરાના ભાવ, દેહના વળાંકો ઊડીને આંખે વળગે તેવા છે. પાત્રોને જીવંત, આકર્ષક અને સૌંદર્યમય બનાવવાનું અજબ કૌશલ્ય એમને હસ્તગત છે

- પ્રિયંકા જોષી

જળના લાગણીભીનાં ખળખળ સામે જ્યારે પાષાણની રુક્ષ કરકર ખરી પડે છે ત્યારે તેની સુંવાળપ ભાવનાશીલ હૃદયને ઇજન આપે છે. રેતીમાં રમમાણ થવાનું ઇજન, તેમાં વિખરાઈ જઈને ફરી નવો ઘાટ ધરવાનું ઇજન. દરિયાની રેતીના કણકણમાં કિનારાનાં કેટકેટલાં સ્મરણો સમાયાં હશે! કોઈ એકલ પ્રેમીએ કિનારા પર લખેલું પ્રિયજનનું લખેલું હોય કે જોડાજોડ ચાલેલાં પગલાં. બાળકોની કિલકારીઓ અને એમનાં સપનાના મહેલ. દરિયો બધું જાણે છે. દૂર રહ્ય-રઘે આ સંસાર નીરખતો રહે છે.

આ વિરાટ જળવિસ્તાર પર સૌ પોતાની કલ્પના અને સ્મરણોની રંગોળી પૂરતું રહે છે. કોઈ આનંદ મેળવવા આવે છે તો કોઈ ઉદાસી ઓગળવા; પ્રવાસી કુતૂહલથી પ્રેરાઈને આવે છે, તો રહેવાસી જરૂરિયાતથી. બહુ ઓછા લોકો દરિયાને મળવા આવે છે. જે આ સમુદ્રને તેના ભવ્ય સ્વરૂપને જોઈને આકંઠ ધન્યતા અનુભવે છે.

એક વાંઢિયાર કુટુંબ પોરબંદર આવીને વસ્યું. વર્ષ ૧૯૫૬, નવેમ્બરની ૩૦મી તારીખે આ કુટુંબમાં દીકરો અવતર્યો. શું એ બાળકે પ્રથમ શ્વાસમાં દરિયાઈ હવામાં ભળેલો રેતીનો સાદ પણ છાતીમાં સાચવી રાખ્યો હશે કે કેમ, એવો સહજ પ્રશ્ન થાય જ્યારે આ વાત નથુભાઈ ગરચરની હોય.

કલાતીર્થ દ્વારા પ્રકાશિત થતી કલાગંગોત્રી ગ્રંથશ્રેણીનું દસમું સોપાન પ્રસિદ્ધ રેતશિલ્પકાર નથુભાઈ ગરચરની સર્જન સૃષ્ટિનું દર્શન કરાવે છે. આપણે ત્યાં હજુ રેતશિલ્પ વિશે પૂરતી જાગૃતિ નથી. એવા સંજોગોમાં આ પુસ્તક કલા અને કલાકારનો મહિમા કરે છે. એ ઉપરાંત કલારસિકો માટે પણ એક અજબ ક્ષેત્ર ખોલી આપે છે. આ કલાગ્રંથના પાને પાને રેતશિલ્પોની અનેરી સૃષ્ટિને ૨૦૦થી વધારે તસવીરો દ્વારા સ્થાયીરૂપ આપવાનો પ્રયાસ થયો છે.