વિજ્ઞાનપ્રવાહનો ઓછો જાણીતો અભ્યાસક્રમઃ ઓડિયોલૉજી

જીવવિજ્ઞાન વિષય સાથે બારમું ધોરણ પાસ કરનાર વિધાર્થી ઓડિયોલોજીમાં ડિગ્રી અથવા ડિપ્લોમા કોર્સ કરી શકે છે. ડિગ્રી લેવલ કોર્સ ત્રણ વર્ષનો હોય છે, જે ઉમેદવાર ડિગ્રી કે ડિપ્લોમા કોર્સ ન કરી શકતા હોય તેઓ સર્ટિફિકેટ કોર્સ પણ કરી શકે છે

વાયુ પ્રદૂષણની સાથે ધ્વનિ પ્રદૂષણની માત્રામાં પણ ઉત્તરોત્તર વધારો થઈ રહ્યો છે. વાહનોના હોર્નના અવાજ, એન્જિનોનો શોરબકોર, હેડફોન અને ડીજે જેવાં ઉપકરણોનો ઉપયોગ, કેટલીકવાર શારીરિક તકલીફોને કારણે અવાજની સાંભળવાની ક્ષમતા ક્ષીણ થઈ રહી છે. પહેલાંના સમયમાં વૃદ્ધ વ્યક્તિઓમાં શ્રવણશક્તિને લગતી સમસ્યાઓ જોવા મળતી હતી. હવે યુવાન ઉંમરે પણ લોકોમાં સાંભળવામાં મુશ્કેલી પડતી હોવાની ફરિયાદ સાંભળવા મળતી હોય છે. શ્રવણશક્તિને લગતી સમસ્યાઓના નિરાકરણ માટે ઓડિયોલોજિસ્ટ મદદરૂપ થાય છે. આરોગ્ય ક્ષેત્રે પેરામેડિકલની ડિમાન્ડમાં દિનપ્રતિદિન વધારો થઈ રહ્યો છે, જેમાં ઓડિયોલોજિસ્ટની પણ માગ વધી રહી છે. એક સંશોધન અનુસાર ભારતમાં ૬ ટકાથી પણ વધુ વસતિ હિયરિંગ લોસ એટલે શ્રવણ ક્ષમતા ગુમાવી ચૂકી છે.