-અને નવા વર્ષની કેટલીક અજોડ શુભેચ્છાઓ

‘મની’ ન હોય, ‘ટાઇમ' તો છે ને! ટાઇમને મની સમજી એની બચત કરો.

-  હર્ષદ પંડ્યા

વિક્રમ સંવત ૨૦૭૯નું વર્ષ તો પૂરું થઈ ગયું. ૨૦૮૦નું વર્ષ સૌ માટે એટલું જ સરસ, એટલું જ પ્રસન્ન અને એટલું જ સ્વસ્થ નીવડે, કે જેની સૌએ પોત પોતાની રીતે યથાશક્તિ કલ્પના કરી હોય.

હમણાં એક મિત્ર મળ્યા. એમણે ચાની ચૂસકી લેતાં મને કહ્યું : ‘હું વિચારું છું કે નવા વરસમાં એકાદ બંગલો, બે-ત્રણ પ્લોટ અને એકાદ મર્સિડિઝ કાર ખરીદી લઉં.’ મેં એમની વાતને કાપતાં કહ્યું: ‘આ તો ઓછું કહેવાય, કંઈક વધારે ખરીદવાનું વિચારો.' ત્યારે મિત્રએ ચોંકીને પૂછ્યું: ‘વધારે? આનાથી વધારે તો જોખમ ના કહેવાય?’ ત્યારે મિત્રના ખભા પર હાથ મૂકતાં મેં કહ્યું: ‘મિત્ર, ખરીદી કરવામાં જોખમ હોય, વિચાર કરવામાં થોડું હોય?’

આવું છે મિત્રો! પણ ૨૦૮૦ના નવા વર્ષમાં, શક્તિ ન હોય તો પણ આવું આવું વિચારવાની શક્તિ મળે એય ઘણું કહેવાય! તો, ૨૦૮૦નું નવું વર્ષ આપ સૌને સુખદાયી, યશદાયી અને ફળદાયી નીવડે એ માટે હું આ પ્રમાણે શુભેચ્છાઓ પાઠવું છું:

* અમેરિકાના સ્થાપકો પૈકીના એક બેન્જામિન ફ્રેન્કિલને ૧૭૪૮માં બહુ જ ફ્રેન્ક્સી કહેલું કે Time is money.

આજના નવા વર્ષે સૌને શુભેચ્છા કે બચત કરવા માટે ભલે ‘મની’ ન હોય, ‘ટાઇમ’ તો છે ને! ટાઇમને મની સમજી એની બચત કરો.

જમાનો ફાસ્ટનો છે, મતલબ કે ઉપવાસનો નહીં, ઝડપનો છે. આજે બધાંને બધું જ ફાસ્ટ જોઈએ. આજના ફાસ્ટ ટાઇમમાં બચત કરવા જેવું આપણી પાસે હજુ પણ કંઈ બચ્યું હોય તો તે સમય છે, ટાઇમ છે. ટાઇમનું ઇન્વેસ્ટમૅન્ટ ઊંઘમાં – મતલબ કે ઊંઘવામાં કરો. દુનિયામાં સૌથી વધુ ઘાતક કોઈ રોગ હોય તો તે છે અનિદ્રાનો રોગ. મોટા ભાગના લોકો ઊંઘવા માટે હજારો-લાખો રૂપિયા ખર્ચી નાખે છે. જેને ઊંઘવાનું વરદાન મળ્યું છે એણે આજથી જ સહેજ પણ આળસ કર્યા વિના બસ ઊંઘવા જ માંડવું. સુખી માણસ જ ઊંઘી શકે છે, શ્રીમંત નહીં. ભગવાન તમને સુખી બનાવે એવી શુભેચ્છા!

* નવા વરસમાં તમારે ત્યાં આવતા દરેક અતિથિમાં તમને દેવદર્શન થાય અને ચાન્સ મળ્યે તમે કોઈને ત્યાં અતિથિ બનીને જાઓ, તો એ લોકોને પણ તમારામાં દેવદર્શન કરવાની શક્તિ મળે એ માટે તમને અને એમને ખૂબ ખૂભ શુભકામનાઓ!