ફેશન

હેર એક્સટેન્શન : તામ નામ એક, કામ અનેક

- હેતલ ભટ્ટ

લાંબા - કાળા - ભરાવદાર - જાડા વાળ મોટા ભાગની મહિલાઓની એષણા હોય છે. આજે પણ જ્યારે પણ કોઈ યુવતી કે મહિલાના લાંબા વાળ જોવા મળે તો લોકો તે જોઈને મંત્રમુગ્ધ થઈ જતાં હોય છે, કારણ કે સુંદર કેશકલાપ મહિલાના સૌંદર્યનું આભૂષણશૃંગાર માનવામાં આવ્યું છે. વાળની માવજત માટે વિશેષ કાળજી રાખવામાં આવે છે. છતાં પણ બદલાઈ રહેલી જીવનશૈલી, પ્રદૂષણ, ખાનપાન અને બીમારીઓને કારણે વાળની દરકાર રાખવામાં મુશ્કેલી ઉદ્ભવે છે. પરિણામે સુંદર લાંબા કાળા ભરાવદાર વાળની ઇચ્છા હોય તો પણ તે પૂરી નથી કરી શકાતી. હવે આ સમસ્યાનું સમાધાન બજારમાં ઉપલબ્ધ છે અને તેનું નામ છે હેર એક્સટેન્શન. હેર એક્સટેન્શનને આપણે કૃત્રિમ વાળ તરીકે ઓળખી શકીએ. વિગનું થોડું બદલાયેલું રૂપ. જે મહિલાઓના વાળ પાતળા હોય, વાળને લઈને કોઈ સમસ્યા હોય, ટૂંકા વાળ ગમતા હોય, પરંતુ/ ક્યારેક લાંબા વાળવાળી હેર સ્ટાઇલ કરાવવી હોય, બીમારીને કારણે વાળનો ગ્રોથ ન થતો હોય તો આ બધી તકલીફો હેર એક્સટેન્શનના ઉપયોગ દ્વારા દૂર કરી શકાય છે. જેમાં કૃત્રિમ વાળ તૈયાર કરીને આપવામાં આવે છે. વ્યક્તિએ ક્લિપની મદદથી તે લગાવવાના હોય છે. ખૂબ સરળતાથી તેનો ઉપયોગ કરી શકાય છે.