એનાલિસિસ

વૈશ્વિક સ્તરે શિરમોર એવી ગ્લોબલ ઇન્વેસ્ટર્સ સમિટની ગુજરાત ગાથા કેવી છે?

- સુધીર એસ. રાવલ

ગુજરાતમાં વર્ષ-૨૦૦૩થી શરૂ થયેલી અને કોરોના કાળનો અપવાદ બાદ કરતા નિયમિતરૂપે દર બે વર્ષે યોજાતી વાઇબ્રન્ટ ગુજરાત ગ્લોબલ ઇન્વેસ્ટર્સ મિટની શૃંખલામાં દસમી વાઇબ્રન્ટ સમિટ આ સપ્તાહે ગાંધીનગરના મહાત્મા મંદિરમાં યોજાઈ ગઈ. સમિટમાં વડાપ્રધાન નરેન્દ્ર મોદી, મુખ્ય મહેમાન એવા યુએઈના રાષ્ટ્રપ્રમુખ શેખ મોહમ્મદ બીન ઝાયેદ અલ નાહ્યાંન, મોઝામ્બિકના રાષ્ટ્રપતિ ફિલિપ ન્યુસી, ચેક રિપબ્લિકના વડાપ્રધાન પીટર ફીયાલા, ડેમોક્રેટિક રિપબ્લિક ઑફ તિમોર લેસ્તેના રાષ્ટ્રપતિ જોસ રામોઝ હોરતા સહિત ૧૦૦થી વધુ દેશોના પ્રતિનિધિઓ, ભારતના ગૃહમંત્રી અમિત શાહ તથા અન્ય કેન્દ્રીય મંત્રીઓ, મુકેશ અંબાણી અને ગૌતમ અદાણી સહિત અનેક અગ્રણી ઉદ્યોગપતિઓ, વ્યાપાર જગતના દેશ-વિદેશના મહારથીઓ ઉપસ્થિત રહ્યા હતા. છેલ્લા ઘણા લાંબા સમયથી સમિટને સફળ બનાવવા માટે ગુજરાતના મુખ્યમંત્રી ભૂપેન્દ્ર પટેલ, તેમનું મંત્રીમંડળ, ઉચ્ચ સનદી અધિકારીઓ તથા તેમના સહયોગીઓએ જે રીતે અથાક પુરુષાર્થ કર્યો હતો, પરિણામ પણ એવું જ રોમાંચકારી અને સફળ સાબિત થયું હતું.

સરકારે ૨૦૨૨ના ૫૭૨૪૧ સમજૂતી કરાર દ્વારા ૧૮.૮૭ લાખ કરોડનાં મૂડીરોકાણ અને આ સમિટમાં વિક્રમસર્જક કહી શકાય તેટલા ૪૧૨૬૬ સમજૂતી કરાર દ્વારા ૨૬.૩૩ લાખ કરોડનાં મૂડીરોકાણ સહિત કુલ ૯૮૫૪૦ સમજૂતી કરાર દ્વારા ૪૫ લાખ કરોડનાં મૂડીરોકાણના અંદાજની ગૌરવભેર જાહેરાત કરી હતી. ગુજરાતમાં જે ક્ષેત્રોમાં મૂડીરોકાણ માટે સમજૂતી કરારો થયા છે તેમાં પાવર, ઓઇલ, ગેસ, કેમિકલ, પેટ્રોકેમ, એન્જિનિયરિંગ, ઑટો, શહેરી વિકાસ, નાણાકીય સેવાઓ, માહિતી ટૅક, બાયોટેક, પોર્ટ અને પોર્ટ લેડ, ખનીજ, કાપડ અને વસ્ત્રો, રોડ એન્ડ રેલ પ્રોજેક્ટ, પ્રવાસન, નાગરિક ઉડ્ડયન, હેલ્થ કૅર અને ફાર્મા, વન અને પર્યાવરણ, એગ્રો અને ફૂડ પ્રોસેસિંગ, ઔદ્યોગિક લોજિસ્ટિક પાર્ક, મિની એસ્ટેટ, પાણી પુરવઠો, પશુપાલન, મત્સ્ય ઉદ્યોગ, સહકાર, શિક્ષણ, કૌશલ્ય વિકાસ, ગ્રામીણ વિકાસ અને ગ્રામીણ આવાસ, ઇન્ફ્રાસ્ટ્રક્ચર, રમતગમત, યુવા સંસ્કૃતિ, આદિજાતિ વિકાસ, એમએસએમઈ મુખ્યત્વે છે.

ત્રણ દિવસ સુધી ચાલેલી આ સમિટના અન્ય આંકડાઓ પણ રસપ્રદ છે. સમિટમાં ૩૫ દેશો પાર્ટનર કન્ટ્રી તરીકે જોડાયા હતા. ૧૩૧૯૪૩ લોકોએ રજિસ્ટ્રેશન કરાવ્યું હતું. ૩૫૯૦ ઇન્ટરનેશનલ ડેલિગેશન ઉપસ્થિત રહ્યા હતા. ૨૮૬૨ બિઝનેસ ટુ બિઝનેસ અને ટુ ૧૩૬૮ બિઝનેસ ટુ ગવર્મેન્ટ બેઠકો થઈ હતી.