ગાંધીધામ મહાપાલિકા લઈ ગયું અને ભુજ રહી ગયું!!!

દેશના સૌથી મોટા જિલ્લા કચ્છનાં બે મહત્ત્વનાં શહેરો છે. એક ભુજ, જિલ્લાનું વડું મથક અને ઇતિહાસને સંગ્રહીને બેઠેલું શહેર, જ્યારે બીજું ગાંધીધામ, કચ્છની આર્થિક રાજધાનીનો દરજ્જો ધરાવતું શહેર. બંને શહેરો મહાનગરપાલિકાના દરજ્જા માટે વર્ષોથી પ્રયત્નો કરતાં હતાં.

-  સુચિતા બોઘાણી કનર

કચ્છમાં રાજાશાહી શાસનના સમયમાં ભુજ રાજધાનીનું શહેર હતું. સ્વતંત્રતા પછી ભારતમાં ભળ્યા બાદ કચ્છને ‘ક’ વર્ગના રાજ્યનો દરજ્જો મળ્યો, તે મુંબઈ રાજ્ય સાથે ભળ્યું, કચ્છને ગુજરાતનો એક જિલ્લો બનાવાયો ત્યારે પણ તેનું વડું મથક ભુજ જ હતું. ભૂકંપ પછી શહેરનો વિકાસ થયો. છેલ્લા બે દાયકામાં વસતિ અને વિસ્તાર પણ વધ્યો. અત્યારે ૫૬ કિ.મી.ની ત્રિજ્યામાં ફેલાયેલા આ શહેરની મૂળભૂત જરૂરિયાતો પૂરી પાડવામાં નગરપાલિકા હાંફી રહી છે. નિયમિત પાણી વિતરણ થતું નથી, રોજેરોજ રસ્તાઓ ખોદાય છે, અનેક વિસ્તારોમાં ગટરો ઊભરાય છે, સફાઈ નિયમિત રીતે થતી નથી. અપૂરતી રોડલાઇટ ના કારણે અંધારાં ઉલેચાતાં નથી. વેરાઓ ભરવા છતાં લોકોની રોજિંદી જરૂરિયાતો નગરપાલિકા પૂરી કરી શકતી નથી. આથી જ લોકો મહાનગરપાલિકા મળે તેવું ઇચ્છે છે. નજીકના અને પરા સમાન ગ્રામપંચાયત હસ્તકના વિસ્તારોનો સમાવેશ થાય તો મહાનગરપાલિકા માટેના વિસ્તાર અને વસતિના મહત્ત્વના માપદંડો ભુજ પૂરા કરે છે. આથી ૨૦૨૪ના બજેટમાં ભુજની મહાનગરપાલિકા મંજૂર થશે એવો આશાવાદ લોકો સેવી રહ્યા હતા, પરંતુ બજેટમાં સમાવેશ ગાંધીધામનો થયો, ભુજ તો હંમેશની જેમ અન્યાયનો શિકાર થઈને બાપડું બનીને બેસી રહ્યું. ગાંધીધામને મહાનગરપાલિકા મળી તે સામે તો કોઈને વાંધો ન હોય, પરંતુ ભુજને ન મળી તેનો અફસોસ જરૂર છે. અત્યારે નેતાઓ એવું કહી રહ્યા છે કે, આ અંગે ફરી રજૂઆતો કરીશું, જો ભુજ મહાનગરપાલિકા બનવા માટેના તમામ માપદંડો પર પૂરું ઊતરતું હશે તો ભવિષ્યમાં ચોક્કસ મળશે, પરંતુ આજની તારીખે ગુજરાતના તમામ જિલ્લાઓમાં નજર કરીએ તો ખ્યાલ આવે કે, એક જિલ્લામાં એક જ મહાનગરપાલિકા છે. તો પછી ભવિષ્યમાં ભુજને અપવાદરૂપ ગણીને મહાનગરપાલિકા મળશે, એ બાબત લોકોના મનમાં શંકા પ્રેરેછે.