શિક્ષણ

એબીસી ક્રેડિટ : આ એકાઉન્ટ નવી શિક્ષણ નીતિનું મહત્ત્વનું પાસું બની રહેશે

- જ્વલંત નાયક

ભારત દેશની એક કઠે એવી બાબત એ છે કે શિક્ષણ ક્ષેત્રમાં આવતા બદલાવ, સુધારા-વધારા અંગે જાહેર માધ્યમોમાં ખાસ ચર્ચાઓ નથી થતી. પરિણામે વિદ્યાર્થીઓના જીવન ઘડતર સાથે જોડાયેલી પાયાની ઘણી બાબતો સાથે વિશાળ જનસમૂહની નિસ્બત બંધાતી નથી. નકારાત્મક બાબતો તો થોડી ઘણીય મીડિયામાં ચમકી જાય, પણ સકારાત્મક બાબતો તો લગભગ વિસારે પડે! એટલે જ કદાચ થોડા સમય પહેલાં વીર નર્મદ દક્ષિણ ગુજરાત યુનિવર્સિટીએ નવી શિક્ષણનીતિ અંતર્ગત જે કીર્તિમાન સ્થાપિત કર્યો, એની જોઈએ એવી ચર્ચા ન થઈ. બાકી યુનિવર્સિટીએ જે પહેલ કરી છે, એનાથી વિદ્યાર્થીઓની અત્યારની અને ભવિષ્યની પેઢીઓને મોટો ફાયદો મળવાનો છે.

૨૦૨૦માં ભારત સરકારે નવી શૈક્ષણિક નીતિ (ન્યૂ એજ્યુકેશન પૉલિસી-એનઈપી) જાહેર કરી, એ સાથે કેટલાક નવા શબ્દો કોઇન થયા, જેમાં મુખ્ય છે, નેશનલ ઍકેડેમિક ડિપોઝિટરી (એનએડી) અને ઍકેડેમિક બૅન્ક ઑફ ક્રેડિટ (એબીસી). નવી શિક્ષણ નીતિ અમલમાં આવ્યા પછી વિદ્યાર્થી ઓની કારકિર્દીમાં પ્રભાવક બનનારી એબીસી આઈડી અને વીર નર્મદ દક્ષિણ ગુજરાત વિશ્વવિદ્યાલયે આ ક્ષેત્રે મેળવેલી નેત્રદીપક સિદ્ધિ વિષે અહીં વાત કરવાની છે. સાથે જ એબીસી ક્રેડિટ સાથે વણાયેલા કેટલાક ટૅનિકલ તાણાવાણાની પણ ચર્ચા કરીશું.