કવર સ્ટોરી

પંજાબમાં મુખ્તારે આંતર-રાજ્ય માફિયા ગેંગ બનાવી હતી

માફિયા મુખ્તાર અન્સારીએ ૧૯૯૧માં ઉત્તર પ્રદેશથી ફરાર થયા પછી પંજાબમાં રાજકીય આશ્રય મેળવ્યો હતો. ત્યાં જ તેણે પંજાબ, દિલ્હી અને પશ્ચિમ ઉત્તર પ્રદેશના અપરાધીઓ સાથે મળીને ઇન્ટરસ્ટેટ યાને આંતર-રાજ્ય ગેંગ બનાવી હતી અને રાજકીય હત્યાઓ પણ કરી. ઉત્તર પ્રદેશના પૂર્વ ડીજીપી અને રાજ્યસભાના સાંસદ વ્રજલાલના જણાવવા પ્રમાણે ૧૯૯૧માં કલ્યાણસિંહ મુખ્યપ્રધાન બન્યા હતા. એ પછી ગુનેગારોમાં ડર છવાયો હતો. કદાવર અપરાધીઓ પર કાયદાની ચાબુક ચાલી તો મુખ્તાર અન્સારી ઉત્તર પ્રદેશમાંથી ફરાર થઈ ગયો અને પંજાબ પહોંચીને એક મોટા રાજકારણીની મદદ માગી. રાજકીય સંરક્ષણ મળ્યું અને અહીં ફરી ગેંગ ઊભી કરી. વર્ષ ૧૯૯૪માં વી.પી. ગોયલનું અપહરણ કરી બંધક બનાવી રાખ્યો અને તેને મુક્ત કરવાના બદલામાં મોટી રકમની ખંડણી માગી હતી. ખંડણી વસૂલ કરવા માટે મુખ્તાર પોતે સાથીઓ સાથે લોટસ ટૅમ્પલ ગયો હતો. ત્યાં દિલ્હી પોલીસે તેને પકડી લીધો. પછીથી પોલીસે વી.પી. ગોયલને હરિયાણાના પંચકુલામાંથી શોધી કાઢ્યા હતા, જ્યાં તેમને નશાના ઇન્જેક્શન આપી બંધક બનાવી રાખ્યા હતા. આ પ્રકરણમાં મુખ્તારને દસ વર્ષની સજા કરાઈ હતી.