રાજકાજ

સુરતની બિનહરીફ ચૂંટણી કોંગ્રેસની નિર્બળતાની પારાશીશી

- ચાણક્ય

ગુજરાતમાં સુરતની બેઠક ભાજપને બિનહરીફ મળી અને ભાજપના ઉમેદવાર મુકેશ દલાલ બિનહરીફ ચૂંટાયેલા જાહેર થયા. એ ઘટનાએ કોંગ્રેસને માત્ર પ્રાદેશિક સ્તરે જ નહીં તો રાષ્ટ્રીય સ્તરે આઘાત અને આંચકો આપ્યો છે. ભાજપે આ બેઠક બિનહરીફ મેળવવા સામ, દામ, દંડ અને ભેદની નીતિ અપનાવી હોય એ તો સમજી શકાય તેવી વાત છે, પરંતુ ચૂંટણી જંગમાં કોંગ્રેસ આટલી હદે અબુધ અને બેદરકાર પુરવાર થાય એ આશ્ચર્યજનક છે. આવી સ્થિતિમાં મૂલ્યો અને નૈતિકતાના તત્ત્વજ્ઞાનની કોઈ ફલશ્રુતિ પ્રાપ્ત થતી નથી. અગાઉનાં વર્ષોમાં પૂર્વાશ્રમમાં જનસંઘ અને ભાજપના આરંભનાં વર્ષોમાં વારંવારના પરાજય સમયે બીજે દિવસે તેના નેતાઓનાં નિવેદનો આપતાં કે નૈતિક વિજય અમારો છે. આવી આત્મ સંતુષ્ટિ કેળવવી એ પણ કષ્ટદાયક હોય છે, પરંતુ આવી મનોભાવના સાથે વર્ષોવર્ષ લડતા-ઝઝૂમતા રહેવાનું સરળ નથી હોતું. ભૂતકાળમાં કોંગ્રેસના ઉમેદવારો જ્યારે પણ બિનહરીફ વિજેતા બન્યા હતા એ બધા કાંઈ સદાચારથી જ વિજેતા બન્યા હશે એવું માની લેવાની જરૂર નથી.