વાણી એ અગ્નિ છે, ભસ્મીભૂત પણ કરી શકે અને હૂંફ પણ આપી શકે

આપણી વાણીનો વિસ્તાર નકામી લવારીથી લઈને નાદ બ્રહ્મની સાધના સુધી વિસ્તરી શકે છે. બસ, એ વિસ્તાર કેવી રીતે કરવો એ આપણે જોવાનું છે.

- મિલી મેર

મારા જૂના પાડોશમાં બેઉં બાજુ જે બે બહેનો રહેતાં એ બહેનો એકવાર મારા ઘરમાં એકસાથે ભેગાં થઈ ગયાં. અમારા ડ્રોઇંગ રૂમમાં પુસ્તકો પડ્યાં હતાં. તો એમાંથી એક બહેન હાથમાં પુસ્તક લઈને બોલ્યાં કે, ‘અરે, મારી મમ્મીને પણ તમારી જેમ આવાં પુસ્તકો વાંચવા ખૂબ ગમે... એ એકલાં પડે એટલે વાંચતાં જ હોય.' ત્યાં બીજા પાડોશીબહેન બોલી ઊઠ્યાં, ‘એમ તો મારી મોટી બહેનનેય બહુ વાંચવાનો શોખ છે, એટલે જ એને આંખે નંબર આવી ગયા.' વાત બહુ નાનકડી છે, પણ બેઉં પાડોશીબહેનોની વાણી એ બેઉના સ્વભાવને જણાવી દે છે. હમણાં એક સરસ વાત સાંભળવામાં આવી કે, વિક્ટર જ્યારે જહોન વિશે વાત કરે છે ત્યારે આપણને જ્હોનનો પરિચય ઓછો પણ વિક્ટરનો પરિચય વધુ મળે છે. વ્યક્તિ કોઈ પણ મુદ્દા પર કે કોઈ પણ માણસ વિશે બોલતો હોય ત્યારે ખરેખર તો એ પોતાનો સ્વભાવ અને વિચારો છત્તા કરતો હોય છે.