કરવા જેવો એક સત્યનો પ્રયોગ રાજકીય રક્ષાબંધન

શાસકપક્ષ અને વિરોધપક્ષ બંને એકબીજાનું રક્ષાબંધન કરે.

- હર્ષદ પંડ્યા ‘શબ્દપ્રીત’

સત્તા અને ભ્રષ્ટાચાર સગાં ભાઈબહેન છે. ભ્રષ્ટાચારભાઈના હાથે સત્તાબહેન રક્ષાબંધન કરે છે ત્યારે એ ભાઈ એની બહેનને જે ભેટ આપે છે એનું નામ છેઃ chance! અને આશીર્વાદ આપે છે એનું નામ છેઃ આયુષ્યમાન ભવ:

કહેવાય છે કે વહેલી પરોઢનું સપનું સાચું પડે છે. શરત એટલી કે પરોઢનો સમય આપણી વ્યાખ્યા મુજબનો નહીં, કુદરતની વ્યાખ્યા મુજબનો હોય.

ગઈકાલે સપનામાં અમને ડોલતો ડુંગર નહીં, પણ ડોલતો દરવાજો દેખાયો. દરવાજો સોનાનો હતો અને રત્નમંડિત હતો. દરવાજાની મેઇન કમાન પર લખેલું હતું - ‘૨૧મી સદીનું રાજકીય રક્ષાબંધન.' આ કોઈ પૉલિટિકલ પાર્ટીનો સમારોહ નહોતો, કેમ કે દરવાજો સાચા સોનાનો અને સાચા રત્નોનો હતો.

દરવાજાની બહાર ભારે ભીડ જામી'તી. કાર્યક્રમ જાહેર જનતા માટેનો હતો, પણ જનતા બિચારી રાબેતા મુજબ સાઇડમાં ધકેલાઈ ગઈ’તી અને રાજકીય સમારોહ નહીં હોવા છતાં રાજનેતાઓનાં ટોળેટોળાં અંદર ઘૂસી રહ્યાં’તાં. હું જનતાનો જ એક અંશ હોવા છતાં અંદર પ્રવેશતાં મને અટકાવી દીધો'તો. આજે મને આમઆદમી અને ખાસ આદમી વચ્ચેનો જ ફરક નહીં, અંશવાદ અને વંશવાદ વચ્ચેનો ફરક પણ સમજાઈ ગયો.