પશ્ચિમ બંગાળમાં રાષ્ટ્રપતિ શાસન લદાશે?

મમતા બેનરજીની સરકાર લોકોની અપેક્ષા પર ખરી ઊતરી નથી. તેમણે તેમની જવાબદારી નિભાવી નથી. મને બંગાળના લોકોની ચિંતા છે. આ સરકાર અપરાધીઓને બચાવી રહી છે

- ચાણક્ય

પશ્ચિમ બંગાળનો મામલો પેચીદો બની રહ્યો છે. કોલકાતાની આર.જી. કર હૉસ્પિટલમાં રેસિડેન્ટ ડૉક્ટર પર બળાત્કાર અને હત્યાનું પ્રકરણ સીબીઆઇની તપાસના તબક્કામાં છે. આ ઘટના પ્રકાશમાં આવ્યા પછી તુરત જ એક તરફ હૉસ્પિટલ પ્રશાસન અને બીજી બાજુ રાજ્ય સ૨કા૨ તેમ જ રાજ્ય પોલીસ દ્વારા અપનાવવામાં આવેલ વલણ અનહદ વિવાદાસ્પદ રહ્યું. ઘટના અંગે કાનૂની કાર્યવાહીનો માર્ગ અપનાવવાને બદલે તેને રફેદફે કરવાના પ્રયાસે રાજ્ય સરકારને પણ ભીંસમાં લીધી છે. સરકારની અનિચ્છા છતાં અદાલતના આદેશથી તપાસ સીબીઆઇને સોંપાઈ. મામલો છેક સર્વોચ્ચ અદાલત સુધી પહોંચ્યો છે. પરિસ્થિતિની વિચિત્રતા એ છે કે એક તરફ વિપક્ષ ભાજપ દ્વારા ન્યાય માટે ઝુંબેશ ચલાવવામાં આવે છે, ત્યારે બીજી બાજુ રાજ્યના મુખ્યપ્રધાન પણ રેલી યોજે છે.

તાજેતરમાં રાષ્ટ્રપતિ દ્રૌપદી મુર્મુએ આ ઘટના અંગે કરેલ નિવેદન ચર્ચાનો વિષય બન્યું છે. રાષ્ટ્રપતિએ અત્યંત વ્યથિત શબ્દોમાં કહેવું પડ્યું કે, ‘બસ, હવે બહુ થયું. મહિલાઓ સામેના અપરાધોથી વ્યથિત છું. આ ઘટનાથી નિરાશ અને ભયભીત છું.’