વિઝા વિમર્શ,

યુએસએ વિઝા વિન્ડો (3)

- ડો.સુધીર શાહ

અમેરિકાની વિઝાની બારીમાંથી આપણે ગયાં બે અઠવાડિયાંમાં ઇમિગ્રન્ટ વિઝા વિશે જાણકારી મેળવી. બધા જ અમેરિકામાં સ્થળાંતર કરવાની ઇચ્છા ધરાવતા નથી હોતા. હજારો લોકોને અમેરિકામાં બિઝનેસ માટે જવું હોય છે, ફરવા જવું હોય છે, ભણવા જવું હોય છે, સાંસ્કૃતિક કાર્યક્રમો ભજવવા જવું હોય છે, ટ્રેનિંગ લેવા જવું હોય છે, થોડાં વર્ષો માટે નોકરી કરવા જવું હોય છે, થોડાં વર્ષો માટે એમના બિઝનેસની શાખા ચલાવવા જવું હોય છે, ધર્મનો ફેલાવવો કરવા જવું હોય છે, આવાં આવાં જુદાં કારણોસર એક દિવસથી માંડીને થોડાં વર્ષો સુધી કોઈ ખાસ કારણસર, ખાસ કામ માટે, અમેરિકા જવું હોય છે. એમને અમેરિકાના ઇમિગ્રન્ટ વિઝા મેળવવા નથી હોતા. એની એમને જરૂરિયાત પણ નથી હોતી. તેઓ એમને માટે ઘડવામાં આવેલ નોન-ઇમિગ્રન્ટ વિઝા મેળવવા ચાહે છે.

જે લોકો એમના દેશમાં રાજકીય પદ ધરાવતા હોય છે, મિનિસ્ટર યા એમ્બેસેડર કે ડિપ્લોમેટ્સ હોય છે અને અમેરિકામાં એ જ હોદ્દા ઉ૫૨, એ હોદ્દાને લગતા કાર્ય માટે જવા ઇચ્છતા હોય છે, એમના માટે અમેરિકાના ધ ઇમિગ્રેશન એન્ડ નેશનાલિટી ઍક્ટ, ૧૯૫૨’ની કલમ ૧૦૧(અ)(૧૫)(અ) હેઠળ ‘એ-૧’ સંજ્ઞા ધરાવતા નોન-ઇમિગ્રન્ટ વિઝા ઘડવામાં આવ્યા છે. આ પ્રકારના વિઝા ઇચ્છતી વ્યક્તિ અમેરિકામાં ઓફિશિયલ કામકાજ માટે પ્રવેશવા ઇચ્છતી હોવી જોઈએ. જેઓ રાજકારણી નથી હોતા, પણ ગવર્નર ઓફિસર હોય છે, એમના માટે ‘એ-૨’ સંજ્ઞા ધરાવતા નોન-ઇમિગ્રન્ટ વિઝા ઘડવામાં આવ્યા છે અને ‘એ-૧’ અને ‘એ-૨’ના જેઓ પર્સનલ એટેન્ડન્સ હોય, સર્વન્ટ હોય એમના માટે ‘એ૩' સંજ્ઞા ધરાવતા વિઝા ઘડવામાં આવ્યા છે.