કાશ્મીરના ત્રાસવાદીઓ પાસે એમ૪ રાઇફલ કેવી રીતે પહોંચી?

પાકિસ્તાનના કબજાગ્રસ્ત કાશ્મીરમાં પણ એક મોટી મીટિંગ પણ થઈ હતી. તેમાં પાકિસ્તાની એજન્સી આઇએસઆઇ અને આતંકવાદી જૂથના કમાન્ડર હાજર રહ્યા હતા

જમ્મુ કાશ્મીરમાં છેલ્લા કેટલાક મહિનાઓથી ત્રાસવાદી હુમલા અવિરત ચાલતા રહે છે. વિધાનસભાની ચૂંટણી પછી કોઈ દિવસ એવો રહ્યો નથી કે જે દિવસે ત્રાસવાદી હુમલાની ઘટના બની ન હોય. આ બાબત જમ્મુ કાશ્મીરની નવી સરકાર અને કેન્દ્ર સરકાર બંને માટે ચિંતાનો વિષય છે. જમ્મુકાશ્મીર હજુ કેન્દ્રશાસિત પ્રદેશ છે. એટલે સુરક્ષાની દૃષ્ટિએ કેન્દ્ર સરકારની જવાબદારી વધી જાય છે. અત્યારસુધી ત્રાસવાદને નિયંત્રણમાં લેવાના જે દાવા થતા હતા તેનો છેદ ઉડાડે તેવી પરિસ્થિતિ જોવા મળે છે. હવે કેન્દ્ર સરકારે પણ આ બાબતમાં વધુ ગંભીર થવા જેવું છે. ત્રાસવાદીઓને સ્થાનિક સમર્થન મળી રહ્યું હોવાનું પણ સ્પષ્ટ થાય છે. એ વિના આટલી હદે હુમલા શક્ય બને નહીં. સુરક્ષા એજન્સીઓએ પણ આ બાબતની નોંધ લઈને હવે ત્રાસવાદીઓને હવે આશ્રય આપનાર કે તેની સાથે સંબંધ અથવા સંપર્ક રાખનારાઓ ઉપર પણ આકરા પગલાં લેવાનું જાહેર કર્યું છે, એ અત્યંત યોગ્ય પગલું છે.