મુકામ મુંબઈ

મહારાષ્ટ્રના મતદારોનો ઝુકાવ કઈ તરફ?

- લતિકા શોભા કરંગુટકર

સમગ્ર દેશની નજર હાલમાં મહારાષ્ટ્ર વિધાનસભાની ચૂંટણી પર મંડાયેલી છે. વિધાનસભાની ૨૮૮ બેઠકો માટે લગભગ ૧૬ પક્ષોના ૪૧૪૦ ઉમેદવારો મેદાનમાં ઊતર્યા છે. આ ચૂંટણી માટે લગભગ ૭૦૭૮ ઉમેદવારોએ ફોર્મ ભર્યા હતા, જેમાંથી ૨૯૩૮ ઉમેદવારોએ પોતાના ફોર્મ પરત ખેંચ્યા. બાગી ઉમેદવારો પણ મોટી સંખ્યામાં હતા. હવે મેદાનમાં જે ઉમેદવાર ઊતર્યા છે તેમાં પાર્ટીના નેતા અને ઉમેદવારો પોતાને સાબિત કરવાના પ્રયત્નમાં લાગેલા છે.

બાળાસાહેબ ઠાકરે શિવસેનાના એકનાથ શિંદેએ મહારાષ્ટ્રની જનતા પર જે પ્રભાવ પાડ્યો છે તેની ચર્ચા સમગ્ર મહારાષ્ટ્રમાં મુંબઈથી લઈને દૂરસુદૂર સુધીનાં ગામડાંઓમાં થઈ રહી છે. લોકોને મદદ કરવી, તેમની તકલીફોમાં દોડીને જવું, બાળકો, મહિલા, યુવાનોથી લઈને વૃદ્ધો દરેક વ્યક્તિ માટે જુદી-જુદી યોજનાઓનું આયોજન કરવું, એ યોજનાઓ પર સત્વરે અમલ કરવો જેથી લોકોને આ બધી જ યોજનાઓનો તત્કાળ ફાયદો મળે વગેરે પ્રશંસનીય કાર્યો કર્યા છે. તેમનાં આ કાર્યો પર નજર નાખીએ તો જનમાનસમાં એ જ ચર્ચા છે કે શિંદે સરકારને કારણે રાજ્યમાં ફરીથી બીજેપી, બાળાસાહેબ ઠાકરેની શિવસેના અને રાષ્ટ્રવાદી કોંગ્રેસ અજિત પવાર જૂથના ગઠબંધનમાંથી મહારાષ્ટ્રમાં મુખ્યમંત્રી બનશે.

રાજ્યની પરિસ્થિતિ જોતાં આ શક્યતા નકારી શકાય તેમ નથી. આ સ્થિતિ પર યોગ્ય વિચાર કરનારી સમજદાર અને સુસંસ્કૃત જનતા આજે પણ મહારાષ્ટ્રમાં છે. મહારાષ્ટ્રની જે સ્થિતિ છે એ જોતાં સ૨કા૨ જે યોજનાઓ પ્રજા સમક્ષ લાવી રહી છે તે અનુસાર જો મહારાષ્ટ્રની આર્થિક સ્થિતિ જોવા જઈએ તો થોડા મહિનાઓ પહેલાં જ નાણા મંત્રાલયની સ્થિતિની જાણકારી આપતા રાષ્ટ્રવાદી કોંગેસ પક્ષના નેતા અજિત પવારે જાહેરાત કરી હતી કે, મહારાષ્ટ્ર રાજ્ય દેવાના બોજ તળે દબાયેલું છે. આ દેવું માર્ચ ૨૦૨૫ સુધી ૭.૮૨ લાખ કરોડને પાર કરી જશે. વર્ષ ૨૦૧૪માં આ આંકડો ૨.૯૪ લાખ કરોડ હતો.