નકલી ક્રિકેટ મૅચ ગુજરાતમાં, અસલી સટોડિયા રશિયામાં!

મહેસાણાના ગામના ખૂણે રમાતી ક્રિકેટ મૅચ પર રશિયાથી ક્રિકેટ સટ્ટો ખેલાતો. એનો છૂપો કારોબાર પોલીસે ખુલ્લો પાડ્યો, પણ નકલી મૅચ પર અસલી સટ્ટાના ક્રિકેટ કારનામાનો રંગ બીજાં રાજ્યોને લાગી ચૂક્યો છે.

- મહેશ શાહ (અમદાવાદ)

મહેસાણાના આ મોલીપુર ગ્રાઉન્ડમાં રમાતી હતી ‘આઈપીએલ’ની મૅચ અને આ છે એના ‘ખેલાડીઓ’.

જુલાઈ મહિનાની એક સવાર. સમય અગિયારેક વાગ્યાનો.

ગુજરાતના મહેસાણા જિલ્લાના વડનગર તાલુકાના ૬૩૦૦ની વસતિ ધરાવતા મોલીપુર ગામની સીમમાં એક મેદાનમાં ચેન્નાઈ ફાઈટર્સ અને ગાંધીનગર ચૅલેન્જર્સ ટીમના ખેલાડીઓ વચ્ચે ક્રિકેટ ટુર્નામેન્ટ રમાતી હતી. અહીં જનરેટર, વિડિયો કૅમેરા, લૅપટૉપ, એમ્પ્લિફાયર, એલઈડી ટીવી, હેલોઝન લાઈટ, લોખંડનાં મોટાં સ્ટૅન્ડ, વગેરે મૂકવામાં આવ્યાં હતાં. એક યુવક કૉમેન્ટ્રી આપતો હતો અને અમ્પાયર વચ્ચે વચ્ચે કોઈક સાથે વૉકીટૉકીથી વાત કરતો હતો.

આ મૅચ ખાસ જોવા માટે મહેસાણાથી અમુક જણ મોલીપુર આવેલા. જો કે એ વણનોતર્યા મહેમાન હતા. એમણે મૅચ વખતે ગામવાસીઓને જોયા નહીં એટલે ભારે આશ્ચર્ય થયું. વળી, મૅચનું વિડિયો કૅમેરાથી શૂટિંગ અને લાઈવ સ્ટ્રીમિંગ થતું જોયું એથી રમત છાને છાને અને આયોજનબદ્ધ રમાતી લાગી. મહેસાણાવાસી મહેમાનોને શંકા ગઈ.

થોડી પળોમાં એમાંથી એકે ઊંચા સાદે કહ્યુંઃ સ્ટૉપ ઈટ. અહીંથી કોઈએ ખસવાનું નથી. ખેલાડીઓ, અમ્પાયર, કૉમેન્ટ્રેટર રીતસર ડઘાઈ ગયા. રમતમાં અચાનક ભંગ પડ્યો અને બાદમાં ભાંડો પણ ફૂટ્યો. એ હતો નકલી ક્રિકેટ ટુર્નામેન્ટનો ખેલ.. ને મહેમાનો હતા મહેસાણાની પોલીસ!

આપણે ત્યાં નકલી પોલીસ, નકલી સરકારી અધિકારી, નકલી ડૉક્ટર, વગેરેએ અમુક જગાએ રોફ જમાવીને નામ-દામ મેળવી લીધાંના ઘણા કિસ્સા બન્યા છે. એ યાદીમાં નામ ઉમેરાયું નકલી ક્રિકેટરોનું. ચોંકાવનારી વાત ગણો તો નકલી આઈપીએલ ક્રિકેટ ટુર્નામેન્ટ પર સટ્ટો ખેલાયો હતો રશિયામાં. સંભવતઃ દેશમાં પ્રથમ વાર ગુજરાતમાં નકલી ક્રિકેટનો ખેલ ખેલાયો.

સૌ જાણે છે કે દેશના બીજા કરોડો લોકોની જેમ ગુજરાતવાસીઓ ક્રિકેટપ્રેમી છે. હવે તો અમદાવાદમાં વિશ્વનું સૌથી મોટું ક્રિકેટ સ્ટેડિયમ બન્યું છે. ગુજરાતમાંથી અગાઉ ઘણી વાર ક્રિકેટ સટ્ટાકાંડ પકડાયા છે. હવે નકલી આઈપીએલ ક્રિકેટનું કૌભાંડ ખૂલ્યું.