ફિનટેક કંપનીઓની આટઆટલી લોન ઍપ્સ ગેરકાનૂની?

રિઝર્વ બૅન્કને ફિનટેક કંપનીઓની પ્રવૃત્તિઓની ચિંતા સતત સતાવતી હોવાથી એ આવી કંપનીઓ માટે નવા નિયમો લાવવા માગે છે. કેવા અને શા માટે?

- જયેશ ચિતલિયા

ફિનટેક કંપનીઓ માત્ર એ જ પ્રવૃત્તિ કરે, જેની એમને મંજૂરી આપવામાં આવી છે. એની મર્યાદા ઓળંગવાનો પ્રયાસ એમણે કરવો જોઈએ નહીં, અમે ઈનોવેશનને આવકારીએ છીએ, પરંતુ આ સાથે સમગ્ર ઈકો-સિસ્ટમ નિયમન હેઠળ શિસ્તબદ્ધ વિકાસ પામે એવું પણ અમે ઈચ્છીએ છીએ. દેશની આર્થિક સ્થિરતા વિરુદ્ધ કોઈ રમત ચલાવી લેવાશે નહીં..

આ શબ્દો છે રિઝર્વ બૅન્કના ગવર્નર શક્તિકાંતા દાસના. બાય ધ વે, ફિનટેક કંપનીઓને આવી ચેતવણી આપવાનું કારણ એ છે કે છેલ્લા કેટલાક સમયથી આ કંપનીઓની ગેરરીતિઓ રિઝર્વ બૅન્કની આંખે ચઢી છે.

આ કંપનીઓ રિઝર્વ બૅન્ક માટે સતત ચિંતાનો વિષય પણ બનતી જાય છે, જેના પરિણામે રિઝર્વ બૅન્કે આવી કંપનીઓ પર નિયંત્રણ-નિરીક્ષણ તો વધાર્યું છે, તેમ છતાં આ કંપનીઓની (ગેર)પ્રવૃત્તિઓ એક યા બીજા રૂપે ચાલતી હોય છે. આવી કંપનીઓ સામે સતત વધતી ફરિયાદોને લીધે રિઝર્વ બૅન્કને નવાં રેગ્યુલેશન વિચારવાની ફરજ પડી છે. આવી જે કંપનીઓ એમને આપવામાં આવેલા લાઈસન્સની શરતોનું ઉલ્લંઘન કરશે એની સામે રિઝર્વ બૅન્ક પગલાં લેશે. રિઝર્વ બૅન્ક આ કંપનીઓનાં ધિરાણ કામકાજ અને કેવાયસી બાબતે નિયમોને વધુ કડક બનાવે એવી શક્યતા છે. રિઝર્વ બૅન્કે તાજેતરમાં એમ પણ કહ્યું છે કે કોઈ કંપનીએ એને મંજૂર કરવામાં આવેલા લાઈસન્સમાં ન હોય એવી પ્રવૃત્તિ કરવી હશે તો એણે રિઝર્વ બૅન્કની પૂર્વમંજૂરી મેળવવી પડશે.