તું નારી-મનહારી-સુકુમારી..

વાત હમણાં જગબત્રીસીએ ચડેલી બે ભારતીય નારીની. પહેલી છે બ્રિટનના વડા પ્રધાન રિશી સુનકની ધર્મપત્ની અક્ષતા સુનક તો બીજી છે ‘ટ્વિટર’ની અમેરિકાસ્થિત ટોચની પદાધિકારી વિજયા ગડ્ડે. શા માટે અત્યારે આ બન્નેનાં નામ ચર્ચાને ચાકડે ચડ્યાં છે?

- કેતન મિસ્ત્રી

ભારતની એક ઐતિહાસિક ઘટના સાથે સંકળાયેલી કહેવત ગઢ આવ્યો, પણ સિંહ ગયોમાં થોડો ફેરફાર કરીને કહી શકાય કે યુકે (બ્રિટન) આવ્યું, પણ ટ્વિટર ગયું.

હા, દિવાળીના શુભ દિવસોમાં મૂળ ભારતીય અક્ષતા અને રિશી સુનક યુકેના પ્રધાન મંત્રીના સત્તાવાર નિવાસસ્થાન (૧૦, ડાઉનિંગ સ્ટ્રીટ)માં બિરાજી ગયાં, પણ ટ્વિટર નામનો સોશિયલ મિડિયા મંચ ચલાવતી જંગી કંપનીના ઉચ્ચ પદ પરથી પરાગ અગ્રવાલ અને વિજયા ગડ્ડેની હકાલપટ્ટી થઈ.

પહેલાં વાત કરીએ અક્ષતા મૂર્તિ-સુનકની.

અક્ષતા એ ભારતના ઉદ્યોગપતિ નારાયણ મૂર્તિ અને સમાજસેવી સુધા મૂર્તિની સુકન્યા છે. હવે જો કે અક્ષતાની નવી ઓળખ છેઃ યુનાઈટેડ કિંગડમ (યુકે)નાં ફર્સ્ટ લેડી એટલે કે વડા પ્રધાન રિશી સુનકનાં પત્ની. સુનકદંપતીનું નવું સરનામું છેઃ લંડનમાં સિટી ઑફ વેસ્ટમિન્સ્ટરમાં આવેલી ડાઉનિંગ સ્ટ્રીટમાં ૧૦ નંબરનું મકાન. આશરે ૩૦૦ વર્ષ જૂના અને ૧૦૦ ઓરડા ધરાવતા આ મકાનનો ત્રીજો માળ વડા પ્રધાન અને એમના પરિવાર માટે છે. બાકી તો વડા પ્રધાનની, એમના સ્ટાફની ઑફિસ, કૉન્ફરન્સ રૂમ, ડાઈનિંગ રૂમ, પ્રતીક્ષાખંડ, વગેરે છે.

વિજયા ગડ્ડે

૪૨ વર્ષી અક્ષતા દીદીનો વિવાદ એ છે કે એ યુકેના નવા વરાયેલા પ્રાઈમ મિનિસ્ટરનાં અર્ધાંગિની છે. ના, વિવાદ એ નથી. ગોરા લોકોનાં પેટમાં ચૂંક એ વાતની આવે છે કે એ નૉન-ડોમિસાઈલ છે અર્થાત્ એ હજી બ્રિટનનાં નાગરિક નથી, પણ ભારતીય નાગરિક છે. આ તો હજી બરાબર, પણ ગોરી પ્રજાને વધારે દુખાવો એ વાતનો છે કે યુકે બહારની કંપનીઓમાંથી અબજો રૂપિયાની કમાણી કરવા છતાં એ કરવેરો ભરતાં નથી. યુકેનો કાયદો એવો છે કે તમે એ દેશમાં રહેતા હો ને બીજા દેશોમાંથી કમાણી કરતાં હો તો ૩૮ ટકા જેટલો ટૅક્સ ભરવો પડે.

અક્ષતાનું કહેવું છે કે પોતે ભારતીય નાગરિક હોવાના નાતે યુકેના ટૅક્સબૅક્સના કાયદા એમને લાગુ પડે નહીં. હા, યુકેમાંથી થતી કમાણી પર કાયદેસર કર ભરવો પડે એ ભરવા તૈયાર છું, એની ના નહીં અને હું ભરું પણ છું. આમ લોકો તથા યુકેનાં અખબારો ચિલ્લાય છે કે આ તો દેશ સાથે રીતસરની આર્થિક છેતરપિંડી થઈ. આવી મહિલાનો પતિ આપણો વડો પ્રધાન હોય એ કેવું?