વંચિતોનાં વાણોતરની વિદાય..

સત્તર લાખથી વધુ શ્રમિક મહિલાઓના આઠેક રાજ્યોમાં પ્રવૃત્ત સંભવતઃ દેશના સૌથી મોટા સંગઠન ‘સેવા’નાં સ્થાપક ઈલાબહેન ભટ્ટ સેવા શબ્દનો મર્મ પામ્યાં અને એનો ધર્મ, એની સુવાસ દેશ-દુનિયામાં પ્રસરાવ્યાં.

ઈલાબહેન ભટ્ટઃ સમર્પિત જીવનનો અંત.

વિશ્વખ્યાત સેવા સંસ્થાનાં સંસ્થાપક, ૮૯ વર્ષનાં ઈલા રમેશ ભટ્ટ ૧૫ ઑક્ટોબરની રાતે અમદાવાદથી લાંબો વિમાનપ્રવાસ ખેડી કેનેડામાં રહેતાં પોતાનાં બહેન રૂપાબહેનને મળવા જવાનાં હતાં. એ જ બપોરે એમના પૌત્ર રામેશ્વર મિહિર ભટ્ટને ગોલબ્લેડરની તકલીફ થતાં હૉસ્પિટલમાં દાખલ કરવો પડ્યો.. અને ઈલાબહેને કેનેડાપ્રવાસ રદ કર્યો.

રામેશ્વરનું તો ઑપરેશન થઈ ગયું, પણ અચાનક ઈલાબહેનને બ્રેન સ્ટ્રોક આવ્યો એટલે એમને પણ હૉસ્પિટલમાં દાખલ કરવાં પડ્યાં. ત્યાર બાદ નાની-મોટી શારીરિક તકલીફ આવવા માંડી. એમાં ગૅન્ગરિન જીવલેણ બન્યું. બીજી નવેમ્બરની સવારે ઈલાબહેને હૉસ્પિટલમાં અંતિમ શ્વાસ લીધા. સંયોગથી ત્રણેક વર્ષ પહેલાં કેનેડાવાસી રૂપાબહેનને બ્રેન સ્ટ્રોક આવેલો. રૂપાબહેન જો કે સ્વસ્થ થયાં, જ્યારે ઈલાબહેન સ્વર્ગસ્થ થયાં.