અન્વી ઝાંઝરૂકિયા: અક્ષમ શરીરને બનાવ્યું યોગથી સક્ષમ

જન્મથી જ અનેક વ્યાધિથી પીડાતી સુરતની આ કન્યાએ માતા-પિતાના અથાગ પ્રયત્નથી યોગમાં એવું ધ્યાન પરોવ્યું કે આજે ૧૪ વર્ષની વયે એ દેશની રબર ગર્લ ગણાય છે. દેશ-દુનિયામાં અનેક અક્ષમ બાળકોની રોલ મોડેલ બની છે.

- અરવિંદ ગોંડલિયા

ધામણી.. ઘરે લક્ષ્મીજી અવતર્યાં છે, પણ..

ભાવનગરના ડૉક્ટરના મુખેથી પણ.. સાંભળતાં જ માતા-પિતાની આંખોમાં ચિંતાનાં અષાઢી વાદળ ચઢી આવ્યાં. વાત જ ચિંતા થાય એવી હતી. અવનિ અને વિજય ઝાંઝરૂકિયાને ત્યાં અવતરેલી દીકરીને જન્મતાંવેંત લીલા રંગની ઊલટી થઈ હતી. પછી તો સારવાર દરમિયાન એક-એક બીમારીનું નિદાન થતું ગયું.

આજે એ દીકરી નામે અન્વી ડાઉન સિન્ડ્રોમ, હર્શસ્પ્રંગ ડિઝીઝ, હાર્ટ ડિઝીઝ જેવી પડકારજનક શારીરિક અને માનસિક બીમારી સાથે જીવે છે. ટ્રાઈસોમી અને હર્શસ્પ્રંગ ડિઝીઝને કારણે એના મોટા આંતરડામાં ક્ષતિ છે. તબીબો માટે એ ૭૫ ટકા બૌદ્ધિક દિવ્યાંગ છે અને બોલવામાં પણ સમસ્યા અનુભવે છે. જો કે અત્યારે ૧૪ વર્ષની થયેલી અન્વીએ ભારેખમ અક્ષમતાઓ વચ્ચે પણ પિતાના નામ વિજયનો એના જીવનમાં સાક્ષાત્કાર કર્યો છે.

અન્વીના હૃદયમાં બે છિદ્રની સફળ સર્જરી થઈ છે. માઈટ્રલ તરીકે ઓળખાતા હાર્ટ વાલ્વમાં લીકેજ હોવાથી એ સર્જરી કરવી પડી હતી. એ વખતે ડૉક્ટરે ૧૦ વર્ષ પછી આ વાલ્વ બદલવા કહ્યું હતું. સદ્ભાગ્યે ૧૪ વર્ષ પછી પણ એ વાલ્વ બદલવાની જરૂર નથી પડી, કારણ કે લીકેજ વધ્યું નથી અને હવે કદાચ બીજાં ૩૫ વર્ષ સુધી આ નોબત નહીં આવે એવો ડૉક્ટરનો મત છે. કહે છે ને કે ઈશ્વર એક દરવાજો બંધ કરે છે તો સામે એકાદ બારી તો ખોલી જ આપે છે.

ઢગલાબંધ વ્યાધિઓથી પીડાતી અન્વીએ પાછલાં વર્ષોમાં જે મેળવ્યું છે એ કોઈની પણ માટે અચંબા કે ચમત્કારથી ઓછું નથી. આજે એ એની થોકબંધ સિદ્ધિઓને કારણે અનેક લોકો માટે પ્રેરણાસ્રોત બની ગઈ છે.

અન્વી તો જન્મ સાથે અનેક પડકાર લઈને આવી હતી, હવે સૌથી મોટો પડકાર એનાં માતા-પિતા માટે હતો.. અને અવિન તથા વિજય ઝાંઝરૂકિયાએ પહાડ જેવો પડકાર ઝીલીને દીકરીને એ મુકામ પર પહોંચાડી જ્યાં નૉર્મલ બાળકને પહોંચવું પણ એક સપના સમાન હોય છે. આ મુશ્કેલ પ્રવાસમાં એમને ઘણા માર્ગદર્શક મળ્યા, પણ સૌથી મોટું અને મહાન કામ કોઈએ કર્યું હોય તો એ યોગ છે.

અન્વીના યોગપ્રવેશ અને સફળતાની કહાની વિશે એનાં શિક્ષક માતા-પિતા પ્રિયદર્શિની સાથે સહર્ષ વાત માંડે છે..