એમની જવાબદારીનું શું?

અંગ્રેજો ગયા અને અમલદારશાહી છોડતા ગયા. અપાર સત્તા ધરાવતા આ સરકારી અધિકારીઓ અને મસમોટો કર્મચારીગણ આપણા વિશાળ દેશ અને એની જંગી વસતિ માટે ઘણું કરી શક્યા હોત, પણ તો એમાં કાચું ક્યાં કપાયું?

- હીરેન મહેતા

સરકારી કચેરીની ફાઈલમાં કેટલી જિંદગી અટવાતી હશે?

અંગ્રેજો આપણને લોકશાહી શાસન પ્રણાલીની સાથે સરકારી બાબુઓ અને નોકરશાહોની તોતિંગ ફોજ આપતા ગયા. વર્ષો સુધી જુદા જુદા રાજા કે બાદશાહોના હાથમાં કેન્દ્રિત થયેલી સત્તા પ્રજાએ ચૂંટેલા લોકપ્રતિનિધિઓ પાસે આવી. આપણા માટે આ શાસનપદ્ધતિ પ્રમાણમાં નવી હતી એટલે અને વધુ લોકોને રોજગારીની તક ઊભી કરવા માટે આપણી સરકારોએ વિવિધ વિભાગોમાં નવી નવી નિમણૂક કર્યે રાખી.

એક કામ કરવા માટે બે-પાંચ જણ હોય એટલે ક્યારેક એવુંય થાય કે કામ થાય જ નહીં. કૂવામાં દૂધની બદલે બધા જ કોઈને ખબર નહીં પડે એમ સમજીને પાણીનો લોટો પધરાવે એવો ઘાટ આપણી સરકારી કચેરીઓમાં પણ થવા લાગ્યો. પહેલાને એમ થાય કે બીજો કામ કરશે ને બીજો વળી ત્રીજાની રાહ જોતો હોય, જે પાછો ચોથા પર કામ ઢોળવા તત્પર હોય. સરવાળે કામ તો થાય જ નહીં.