ગૌમાતા બને છે સરોગેટ મધર

આપણી ગીર ગાય બ્રાઝિલ માટે ખરા અર્થમાં કામધેનુ બની છે, પરંતુ કમનસીબે ભારતમાં શુદ્ધ ગીર ઓલાદની ગાયોની સંખ્યા ઘટી રહી છે. આવા સંજોગોમાં ગીર નસલની ગાયોનો વંશવેલો અને દૂધ ઉત્પાદન વધે એ માટે સરકારની મદદથી સરોગેટ મધરની પેટર્ન મુજબ અમરેલીમાં ભ્રૂણ પ્રત્યારોપણનો દેશનો પ્રથમ પાઈલટ પ્રોજેક્ટ હાથ ધરવામાં આવ્યો છે. આવો જોઈએ, એનાં કેવાં છે જમા-ઉધાર પાસાં.

- દેવેન્દ્ર જાની (રાજકોટ)

ભારતમાં ગીર ગાય રોજનું ત્રણથી ચાર લિટર દૂધ આપે છે અને બ્રાઝિલમાં ગીર વંશની ગાય સરેરાશ ૩૫થી ૪૦ લિટર દૂધ આપે છે, આવું કેમ?

આવો સવાલ દેશના પશુપાલકો અને વિજ્ઞાનીઓમાં લાંબા સમયથી ચર્ચાઈ રહ્યો છે. હવે આ સવાલનો જવાબ મેળવવા આધુનિક ટેક્નોલૉજી અને બ્રાઝિલની મદદ લેવામાં આવી રહી છે.

એક સમયે આપણે બ્રાઝિલને ગીર ગાય આપતા હતા, પરંતુ હવે ગીર ગાયના સંવર્ધનમાં ભારતે બ્રાઝિલનો સહયોગ લેવો પડ્યો છે.

ખેડૂત સાહિલ ગોંડલિયાઃ આવા પ્રયોગ થકી શુદ્ધ ગીર ઓલાદ મળે તો દૂધ ઉત્પાદનમાં ફાયદો થાય અને અમારી આવક વધે.

ગીરના સિંહોને બચાવવા જે રીતે દાયકાઓથી પ્રયાસો થયા એવા સંગઠિત પ્રયાસ ગીર ગાયના સંવર્ધન માટે થયા નથી એટલે આ ઉત્તમ નસલની વસતિ સતત ઘટી રહી છે. સૌરાષ્ટ્રમાં શુદ્ધ નસલની ગીર ગાયની સંખ્યા લાખોમાં હતી એ હવે હજારોમાં છે. બ્રાઝિલમાં ૩૫ લાખ જેટલી ગીર ગૌમાતાની સામે સૌરાષ્ટ્રમાં માત્ર પ૦૦૦ જેટલી માંડ બચી છે!

ગીર ગાયના વર્તમાનને જાણીએ એ પહેલાં તેના ભવ્ય ભૂતકાળને વાગોળીએ.

રાજાશાહીના સમયમાં જૂનાગઢ, રાજકોટ, ભાવનગર, અમરેલી સહિતના વિસ્તારોના સ્થાનિક અર્થતંત્રમાં પશુપાલનનો હિસ્સો વધુ હતો. સૌથી વધુ ગીર ગાય રાખવામાં આવતી હતી. દેશી રજવાડાંના રાજવી પરિવારોને ઉચ્ચ ઓલાદના ઘોડા અને ગીર ગાય ભેટમાં આપવાની પ્રથા હતી.

ભાવનગરના મહારાજાએ બ્રાઝિલને આપી હતી શીર ગાય. બ્રાઝિલે એમાંથી વિકસાવી ક્રૉસ બ્રીડથી ગીર ગાય ગીરોલૅન્ડો'.