અત્યારે રાજીનામાનું રાજકારણ જરૂરી છે?

ઓડિશાના ટ્રેન અકસ્માત પછી અશ્વિની વૈષ્ણવ મંત્રીપદ છોડે તો પણ એનાથી આખા રેલવે મંત્રાલયના તમામ અધિકારી-કર્મચારીગણમાં જવાબદારીનું ભાન આવી જાય એ માની લેવું અશક્ય છે. એના બદલે ખરા દોષિતોને શોધવા પર વધુ ધ્યાન આપવું જોઈએ.

- હીરેન મહેતા

કર્ણાટક વિધાનસભાની ચૂંટણીમાં પરાજય પછી એક રેલવે અકસ્માતને કારણે વિપક્ષોને અનાયાસ જ મોદી સરકારને ઘેરવાનો મોકો મળી ગયો છે. ઓડિશામાં થયેલો ટ્રેન અકસ્માત મરણાંકની દૃષ્ટિએ મોટો તો છે જ, થોડો વિચિત્ર છે અને ખુદ રેલવેપ્રધાને શંકા વ્યક્ત કરી છે એ પ્રમાણે કોઈ પ્રકારની ભાંગફોડને કારણે થયો છે.

આ અકસ્માતની તપાસ સીબીઆઈ કરશે અને એમાં ભાંગફોડની શક્યતા નજરે ચડશે તો નૅશનલ ઈન્વેસ્ટિગેશન એજન્સી (એનઆઈએ) પણ તપાસમાં જોડાશે. પોણા ત્રણસો-ત્રણસો મુસાફરનાં મૃત્યુ થાય એના પરથી અકસ્માતની ગંભીરતાનો અંદાજ આવી જાય, પણ આપણા કેટલાક રાજકારણીઓ આ બાબતમાં થોડા અબુધ લાગે છે. હજી તો અકસ્માતની વિગત બહાર આવી રહી હતી અને રેલવેપ્રધાન અશ્વિની વૈષ્ણવ ઘટનાસ્થળે પહોંચી રહ્યા હતા ત્યાં તો વિરોધ પક્ષના નેતાઓ એમના રાજીનામાની માગણી કરવા લાગ્યા. એ માટે અગાઉ લાલબહાદુર શાસ્ત્રીથી માંડી નીતિશ કુમારે એમના રેલવેપ્રધાન તરીકેના કાર્યકાળ દરમિયાન થયેલા અકસ્માતને પગલે હોદ્દો છોડ્યો હોવાનાં ઉદાહરણ આપવામાં આવ્યાં.