સીમાએ ઓળંગેલી સીમાના ભેદ-ભરમ

પબ્જી રમતા હિંદુસ્તાની યુવાન સાથે પ્રેમ થયો એટલે એક પાકિસ્તાની સુંદરી વાયા નેપાળ થઈને સીધી ભારત આવી ગઈ. સાથે ચાર બાળકો લાવી. આ યુવતી સીમા હૈદર આજકાલ ટીવીચૅનલોમાં એક હીરોઈનની માફક છવાયેલી હોવા છતાં પોલીસ માટે તો મોટો કોયડો જ છે.

- સમીર પાલેજા (મુંબઈ)

તૂ મેરા જાનુ હૈ: સીમાને પાકિસ્તાનથી ભારત લાવવામાં ભોળાભટાક દેખાતા સચીને કેવાં કાળાંધોળાં કર્યાં એનો તાગ પોલીસ બહુ કડકાઈથી મેળવી રહી છે.

એ રડે છે, હસે છે, નાચે છે, કૂદે છે, રીલ 1 બનાવે છે– ઈન્સ્ટાગ્રામ પર અપલોડ કરે છે, ટીવીચૅનલોને ઈન્ટરવ્યૂ આપે છે અને પોલીસ તથા બીજી એજન્સીઓની કડક ઊલટતપાસનો સામનો પણ કરે છે.

નામ છે સીમા ગુલામ હૈદર, પણ હવે એના દાવા પ્રમાણે એ છે સીમા સચીન મીણા. મૂળ કરાચીની સીમા આજે ભારતીય ટીવીચૅનલો માટે ટીઆરપીનો એક્કો છે, બોલીવૂડ માટે સીમા સુપર હિટ ફિલ્મ કે વેબ-સિરીઝનો તીખો તમતમતો મસાલો છે તો પોલીસ અને સરકાર માટે માથાનો દુખાવો છે.

ચિત્રલેખાનો આ અંક તમારા હાથમાં આવશે ત્યાં સુધી સીમા હૈદરનો કેસ કેવો વળાંક લેશે એ કહેવું મુશ્કેલ છે, છતાં સીમા-સચીનનાં નિવેદનોના આધારે એમની રોમાન્સકથા એકડે એકથી જાણીએ તો..

દિલ્હી-ઉત્તર પ્રદેશની બોર્ડર નજીક ગ્રેટર નોઈડાના આંબેડકર નગરમાં રહેતો સચીન મીણા કરિયાણાની દકાનમાં કામ કરે. એ પબ્જી રમવાનો શોખીન. પ્રાચીન કાળના રાજકુમારો નદીકિનારે સુંદર પનિહારીના પ્રેમમાં પડતા એવું હવે ઑનલાઈન ગેમ રમનારા સાથે થાય છે.

અંજુ-અરવિંદનો હસતો-ખેલતો પરિવાર ‘ફેસબુક’ના વળગણે તોડી નાખ્યો.

કંઈક એ જ રીતે નોઈડાનો કુમાર સચીન અને કરાચીની પરિણીત સીમા હૈદર પબ્જે રમતાં રમતાં પ્રેમમાં પડ્યાં. વાત મુઝે નિંદ ના આવે.. સુધી પહોંચી. વિડિયો કૉલનાં ચક્કર ચાલુ થયાં. સીમાએ ભારત આવવાના વિઝા માગ્યા, જે રિજેક્ટ થયા. પછી એણે નેપાળના વિઝા લીધા. માર્ચ મહિનામાં વાયા શારજાહ થઈને એ કાઠમંડુ પહોંચી. સચીન પહેલાંથી ત્યાં હાજર હતો. બન્ને સાત-આઠ દિવસ પતિ-પત્ની રૂપે હોટેલમાં રહ્યાં. સીમા હિંદુ બની. પશુપતિનાથ મંદિરમાં જઈને સચીન સાથે લગ્ન પણ કર્યાં. પછી એ પાકિસ્તાન ચાલી ગઈ.

૧૦ મેએ સીમા પોતાનાં ચાર બાળકો સાથે ફરી નેપાળ પહોંચી. બે દિવસ રહીને ત્રીજા દિવસે પોખરાથી ભારત આવવાની બસ પકડી લીધી અને ચેકિંગ વિના ભારત પહોંચી પણ ગઈ!