પોર્ન સાહિત્ય: મળવું આસાન.. વ્યસન તો ઔર સહજ

મોબાઈલ ફોન પર ગલગલિયાં કરાવતી સામગ્રી અતિ સરળતાથી ઉપલબ્ધ છે, પણ એનું વળગણ વ્યક્તિના સંબંધ જોખમાવી શકે છે.

- ડૉ. મિતાલી સમોવા

સૃષ્ટિની ઉત્પત્તિનું કેન્દ્રબિંદુ જીવના પણ ભોગે જીવંત રહેવા પર ટકેલું છે. જીવની ઉત્પત્તિ સંભોગ કે સેક્સ પર ટકેલી છે. જો કે આજે તો ટેક્નોલૉજી એટલી હરણફાળ ભરી ચૂકી છે કે બાળક પેદા કરવા માટે વ્યક્તિએ વિજાતીય પાત્ર સાથે સંબંધ બનાવવાની જરૂર રહી નથી.

અલબત્ત, એવા કિસ્સા હજી અપવાદરૂપ ગણી શકાય. માનવસમાજની વાત કરીએ તો, સેક્સની જરૂરત ફક્ત બાળક પેદા કરવા માટે નથી. સમાજરચનાનો પાયો છે દામ્પત્ય અને એનું મૂળભૂત ઘટક પણ સેક્સ છે. બે વ્યક્તિમાં ભરોસો, એકસૂત્રતા, સંગાથ, ભાગીદારી, એકબીજાના સુખે સુખી અને એકબીજાના દુઃખે દુઃખી થવાની ભાવના કેળવવામાં આરોગ્યપ્રદ સેક્સસંબંધ અગત્યની ભૂમિકા ભજવે છે. બીજી એકેય બાબતે એકબીજાને ઝાઝું ન ગોઠતું હોય, છતાં ફક્ત અનુકૂળ અને સંતોષકારક સેક્સસંબંધ પર ઘણાનાં દામ્પત્યજીવન ટકી જાય છે, જ્યારે ઘણા કિસ્સામાં બન્ને વ્યક્તિ બધી રીતે સારા જીવનસાથી હોવા છતાં સેક્સસંબંધમાં અસંતુષ્ટ હોવા માત્રથી છૂટી પડી જતી હોય છે.