ખરો સાથ તો મિત્રોનો શ્રેયસ ચુનેકર

શ્રેયસ ચુનેકર: કૅન્સર રોગીઓની પીડા સમજીને દિલાસો આપે એવા મિત્રો બહુ જરૂરી છે.

મુંબઈની જાણીતી ટાટા કૅન્સર હૉસ્પિટલના યુવાન કર્મચારી શ્રેયસ ચુનેકરને મળમાં રક્ત પડતું જણાયું ત્યારે એણે પાઈલ્સ હશે એમ ધારીને સમસ્યાની અવગણના કરી. આગળ જતાં સમસ્યા વકરી ત્યારે લોકલ ડૉક્ટરે કૅન્સર હોવાની શક્યતા વ્યક્ત કરી. પછી ટાટા હૉસ્પિટલમાં જ કોલોનોસ્કોપી અને બાયોસ્કોપી કરાવતાં ખબર પડી કે રેક્ટમ (ગુદામાર્ગ)નું કૅન્સર છે.

કૅન્સર નામ સાંભળતાં જ શ્રેયસને ધ્રાસકો પડ્યો. પરિવારમાં કોઈને કૅન્સર તો દૂરની વાત, પણ ડાયાબિટીસ કે બ્લડ પ્રેશર પણ ન હોવાથી કૅન્સરે શ્રેયસને આંચકો આપ્યો. એમાંય ડૉક્ટર કહે કે કર્ક રોગ ઍડ્વાન્સ સ્ટેજ પર પહોંચી ગયો છે. અલબત્ત, સાથે ધરપત પણ આપી કે આની સારવાર શક્ય છે.