સ્વાદિષ્ટ સુહાની સફર...પાપડ-મઠિચાં-ચોળાફળીના ગામની!

કોઈ એક સમયે તણસોલ-વણસોલ તરીકે ઓળખાતું ખેડા જિલ્લાનું ઉત્તરસંડા આજે તો સ્માર્ટ વિલેમાંનું એક બન્યું છે, પરંતુ આ ગામ ઓળખાય છે અહીંના ઑટોમેટિક પ્લાન્ટમાં બનતાં પાપડ, મઠિયાં, ચોળાફળી થડી, જેની સોડમ દેશના સીમાડા વટાવીને ઈંગ્લેન્ડ, અમેરિકા, કેનેડા અને ઓસ્ટ્રેલિયા સુધી પહોંચી છે.

- હેતલ રાવ

ખાણી-પીણી માટે ગુજરાતનાં અનેક ગામ અને શહેર જાણીતાં છે. પછી એ ગાંઠિયા હોય કે ગોટા, ગોટી સોડા અને પેંડા હોય કે લીલો ચેવડો. જો કે વાત પાપડ, મઠિયાં કે ચોળાફળીની આવે ત્યારે ખેડા જિલ્લાનું ઉત્તરસંડા ગામ મોખરે રહે. ખેડા જિલ્લામાં નડિયાદ-આણંદ દાંડીમાર્ગ પર આવ્યું છે આ ગામ. ઉત્તરસંડામાં પ્રવેશતાં જ કતારબંધ દુકાનોમાં પાપડ, મઠિયાં, ચોળાફળીનું વેચાણ થતું જોવા મળે છે અને લગભગ દરેક દુકાન પાસે ગ્રાહકોની ભીડ જોવા મળે છે. કહી શકાય કે અહીં પાપડ, મઠિયાં અને ચોળાફળીની એક આખી ઈન્ડસ્ટ્રી ધમધમે છે. અહીં બનતી ફૂડ આઈટેમ્સ દેશના જ નહીં, દુનિયાના ગુજરાતીઓ, ભારતીયો હોંશે હોંશે આરોગે છે, અનેક દેશમાં એ મોટા પ્રમાણમાં એક્સપોર્ટ થાય છે.

અહીં સવાલ એ થાય કે લ્યા, ઉદ્યોગનો પાયો ઉત્તરસંડામાં જ ચ્યમનો નખાયો?

જવાબ આપતાં ઉત્તરસંડા ગામના દિનેશભાઈ પટેલ ચિત્રલેખાને કહે છેઃ ‘અમારું ગામ એટલે આમ તો પટેલોનું જ ગામ, પણ અહીં દરેક સમાજના લોકો ભાઈચારા સાથે રહે છે. ગામ નાનું, પરંતુ એનું નામ વિશ્વફલક પર છે, જેનું મુખ્ય કારણ અમારો પાપડ ઉદ્યોગ. આ ઉદ્યોગ પહેલાં માતર તાલુકાના સંધાણા ગામે ચાલતો, પરંતુ ત્યાં પાપડ બનાવવા માટે પાણી ઉત્તરસંડાથી લઈ જવામાં આવતું. કહેવાય છે કે ઉત્તરસંડાનું પાણી પાપડ, મઠિયાં માટે ઉત્તમ છે. ઉત્તરસંડાથી સંધાણા પાણી લઈ જવામાં વધારાનો ખર્ચ ઉત્પાદકે ભોગવવો પડતો ને પાપડ, મઠિયાંના ભાવ પણ વધી જતા. ૧૯૮૭માં આ પ્રશ્નનું નિરાકરણ ઉદ્યોગને ઉત્તરસંડામાં શિફ્ટ કરીને લાવવામાં આવ્યું. પાપડની મોટા પાયે પ્રથમ ફૅક્ટરી ઉત્તરસંડામાં શરૂ થઈ. ત્યાર પછી તો અહીં એક પછી એક પાપડ, મઠિયાંનાં કારખાનાં, ગૃહ ઉદ્યોગ, નાની-મોટી દુકાનો શરૂ થઈ. આજે આ બિઝનેસ વૈશ્વિક સ્તરે પોતાનો સ્વાદ અને સોડમ પહોંચાડી રહ્યો છે.’ ઉત્તરસંડાની જાણીતી મઠિયાં, પાપડ, ચોળાફળીની ફૅક્ટરીના સંચાલક ઋષિલ પટેલ ચિત્રલેખાને કહે છે: ‘મારા પિતા દેવેન્દ્રભાઈ ચીમનભાઈ પટેલે ૧૯૯૭માં પાપડની ફૅક્ટરી શરૂ કરી હતી. આજે વિશ્વમાં જાણીતા બન્યા છે. અમારે ત્યાં બનતાં મઠિયાં, પાપડના ૬૦થી ૭૦ ટકા એક્સપોર્ટ થાય છે. અમેરિકા, ઑસ્ટ્રેલિયા, બ્રિટન, દક્ષિણ આફ્રિકા, કેનેડા અને અખાતી દેશોમાં વસતા ગુજરાતીઓને અમારાં પાપડ, મઠિયાં, ચોળાફળીનો સ્વાદ ફાવી ગયો છે.’