નણંદ-ભાભી જ નહીં, બારામતી બનશે સાહેબ અને દાદાના જંગનું સાક્ષી

પાંચ દાયકા કરતાં વધુ સમયથી પુણે જિલ્લાનો મતવિસ્તાર શરદ પવારનો ગઢ બનીને રહ્યો છે. હવે પહેલી વાર એમના સામ્રાજ્ય સામે પડકાર ઊભો થયો છે... અને એ પડકાર એમના ઘરમાંથી જ, સગા ભત્રીજા તરફથી જ છે. દીકરી સામે ભત્રીજાવહુનો આ જંગ જામવાનો છે એ બારામતીનો લઈએ પરિચય.

- ભવ્ય પટેલ । ઉમંગ વોરા

છેલ્લાં પચ્ચીસ વર્ષ દરમિયાન ‘કાંટે કી ટક્કર’ કહી શકાય એવી ચૂંટણી કઈ? એવું કોઈ પૂછે તો સૌથી પહેલા ક્રમે આવે ૧૯૯૯માં કર્ણાટકની બેલ્લારી બેઠક પર સોનિયા ગાંધી સામે ભાજપનાં સુષમા સ્વરાજનો જંગ. એ પછી આવે ૨૦૧૪ લોકસભા ચૂંટણી. બેઠક અમેઠી. હરીફ ઉમેદવારોઃ રાહુલ ગાંધી અને સ્મૃતિ ઈરાની. સત્તાવાર રીતે રાજકારણમાં નવાંસવાં પ્રવેશેલાં સોનિયાએ બેલ્લારીમાં સુષમા સ્વરાજને પરાસ્ત કર્યાં હતાં તો ૨૦૧૪માં અમેઠીમાંથી રાહુલે સ્મૃતિ ઈરાનીને. જો કે ૨૦૧૯માં સ્મૃતિએ રાહુલને ગાંધીપરિવારના ગઢ ગણાતા અમેઠી મતવિસ્તારમાંથી હરાવી આગલી હારનો બદલો લીધો હતો.

સુનેત્રા પવાર-સુપ્રિયા સુળેઃ અમારે અંદરોઅંદર કોઈ વિવાદ નથી, આ લડાઈ માત્ર બે રાજકીય વિચારધારાની છે... ખરેખર?

આ ચૂંટણીની વાત કરીએ તો, હજી કેટલીક બેઠકોના ઉમેદવારનાં નામ જાહેર થવાનાં બાકી છે તેમ છતાં અત્યાર સુધી જે નામ ઘોષિત થયાં છે એ પરથી આ વખતે લાગે છે કે એવો મહાજંગ મહારાષ્ટ્રમાં જોવા મળશે. બેઠક હશે બારામતી.

હા, બારામતી એટલે મરાઠીમાં જેને બાલે કિલ્લા કહે છે એ શરદ પવારનો ગઢ. વર્ષોથી અહીં શરદભાઉનું એકહથ્થુ શાસન ચાલે છે. એ પોતે અથવા એમનાં પુત્રી સુપ્રિયા સુળે કે પછી એમના ભત્રીજા અજિત‘દાદા’ પવાર જ અહીં લોકસભાની એક પછી એક ચૂંટણી જીતતા આવ્યા છે. આ વખતે પણ બારામતીમાં જીતશે કોઈ શરદ પવારના ઘરની જ કહી શકાય એવી વ્યક્તિ, પરંતુ આ વખતે કહાનીમાં થોડો, ના, થોડો નહીં, જબરો વળાંક આવ્યો છે. થયું છે એવું કે આ વખતની ચૂંટણીમાં શરદભાઉએ તો એમનાં દીકરી સુપ્રિયાને જ ફરી ઉમેદવારી આપી છે તો સામે છે, શરદ પવારનાં ભત્રીજાવહુ સુનેત્રા અજિત પવાર અર્થાત્ નણંદ-ભાભીનો જંગ છે બારામતીમાં.

આ અજિત પવાર એક સમયે શરદભાઉના રાજકીય વારસ ગણાતા, પરંતુ પછી શરદ પવારે એમનાં દીકરી સુપ્રિયાને પણ રાજકારણમાં ઉતાર્યાં એટલે રહેતે રહેતે કાકા-ભત્રીજા વચ્ચે અંતર વધતું ગયું. રાજકારણમાં કોઈ પાછું ઝટ નિવૃત્તિ લેતું નથી. અહીં પણ એવું જ થયું. ૮૦ની ઉંમર વટાવ્યા પછી પણ શરદ પવારે એમની રાષ્ટ્રવાદી કોંગ્રેસનું સુકાન છોડ્યું નહીં. બીજી બાજુ, મહારાષ્ટ્રના રાજકારણમાં મોટા ભાઈ એટલે કે દાદા તરીકે ઓળખાતા અજિત પવાર એકદમ અધીરા, મહત્ત્વાકાંક્ષી અને સત્તા માટે હંમેશાં તલપાપડ.