આ તો વહેલા-મોડું થવાનું જ હતું...

ઈઝરાયલ અને પેલેસ્ટિની સંગઠન ‘હમસ’ વચ્ચેનો વિગ્રહ હજી અટક્યો નથી ત્યાં ઈરાને એમાં ઝંપલાવ્યું છે.સામસામે ધમકીની ભાષા વાસ્તવિક યુદ્ધમાં બદલાઈ જશે તો વૈશ્વિક અર્થતંત્ર માટે વધુ એક કટોકટી આવીને ઊભી રહેશે. ઈરાન તરફથી થયેલા હુમલાને ખાળવા ઈઝરાયલે એની આધુનિક ઍન્ટિ-મિસાઈલ સિસ્ટમ કાર્યરત કરી. ઈરાનનું હવે પછીનું પગલું શું હશે?

- હીરેન મહેતા

ધણા જીવ બહુ ઉત્પાતિયા હોય. શાંતિથી રહેવાનું, જીવવાનું એમને રુચતું જ નથી. ઈઝરાયલ અને કેટલાક આરબ દેશોની પ્રજા આ શ્રેણીમાં બંધબેસે એવી છે. સરહદી ઝઘડા તો અનેક દેશ વચ્ચે છે, પરંતુ ઈઝરાયલ અને આરબ રાષ્ટ્રો જેવા ટંટા ભાગ્યે જ આટલા છાશવારે બીજે ક્યાંય થાય છે.

બીજા વિશ્વયુદ્ધ પછી મુસ્લિમ બહુમતી પ્રજાની વચ્ચે અમેરિકા તથા યુરોપના અમુક દેશોએ ધરાર યહૂદીઓને વસાવ્યા (વર્ષ ૧૯૪૮) ત્યારે જ અણસાર હતો કે આ બે પ્રજા પડોશી તરીકે એકમેકને સ્વીકારી નહીં શકે. એક દેશ તરીકે ઈઝરાયલનો જન્મ જ આમ સંઘર્ષનું કારણ બન્યો. અલબત્ત, ૧૯૭૦ના દાયકામાં સૌથી પહેલવહેલા ઈજિપ્તે ઈઝરાયલ સાથે સમજૂતી કરી અને એ પછી જોર્ડન, બહેરિન તથા સંયુક્ત આરબ અમીરાતના પણ ઈઝરાયલ સાથેના સંબંધ સુધર્યા, પરંતુ ઈઝરાયલ અને બીજા આરબ તથા કે ઈતર મુસ્લિમ દેશો વચ્ચે ભાગ્યે જ અમન-શાંતિનો માહોલ જામ્યો છે.