നാടിൻറെ സാംസ്‌കാരിക മൂല്യങ്ങൾ

വർക്കിയും വൈദ്യരും

- വികടൻ

വർക്കി വേഗത്തിൽ നടക്കുകയാണ്. അയാൾ എന്തോ ആലോചിച്ച് കൂട്ടി പായുന്നത് ഹംസ ചായക്കടയിൽ നിന്നും കാണുന്നു.

ഹംസ - അല്ല വർക്കീ എങ്ങോട്ടാ....?

വർക്കി - അതേ... ഇക്കാ സംസാരിച്ച് നിൽക്കാൻ സമയമില്ല, ഒരു കോലം കത്തിക്കലുണ്ട്. നമ്മുടെ ജീ ഇപ്പോഴിങ്ങെത്തും. നാടിന്റെ സാംസ്കാരിക മൂല്യങ്ങൾ തച്ചുടയ്ക്കുന്ന സിനിമാക്കാർക്കെതിരെ ഒന്ന് ആഞ്ഞടിക്കണം. ഇന്ന് സ്വാഗത പ്രാസംഗികൻ ഞാനാ....

ഹംസയ്ക്ക് ചിരി വരുന്നു...

ഹംസ - അപ്പോൾ പിന്നെ അന്റെ നേതാവിന്റെ പ്രസംഗം ആര് കേൾക്കും ?

വർക്കി നടത്തം നിർത്തുന്നു. എന്നിട്ട് ഹംസയെ പരുഷമായി നോക്കുന്നു.

വർക്കി - അതെന്താ ഹംസക്കാ നമ്മുടെ ജീങ്ങള് ഒന്ന് ഇരുത്തിപ്പറഞ്ഞേ...?

ഹംസ - അല്ലടാ... ഞാൻ അന്റെ നേതാവിനെ ഇരുത്തിയതല്ല. നിന്റെ സ്വാഗതപ്രസംഗം തുടങ്ങുമ്പോഴേക്കും കാണികളൊക്കെ ഏറെക്കുറേ പോകുമല്ലോ എന്നോർത്തിട്ട് പറഞ്ഞതാ....

വർക്കിക്ക് അരിശം കയറുന്നു. അയാൾ ഹംസയുടെ കടയ്ക്കരികിലേക്ക് നീങ്ങുന്നു.

വർക്കി - ദേ... നിങ്ങക്ക് ഇതെന്തിന്റെ കേടാണെന്ന് എനിക്ക് മനസ്സിലാകുന്നുണ്ട്. നിങ്ങടെ ആൾക്കാരല്ലേ ഈ പീഡകന്മാരൊക്കെ. അപ്പോൾ പിന്നെ നിങ്ങക്ക് അവരെ സംരക്ഷിച്ചല്ലേ മതിയാകൂ.

ഹംസ - ദേ വർക്കീ... ഇതിൽ രാഷ്ട്രീയമൊന്നുമില്ല കേട്ടോ.... നീ വെറുതേ എഴുതാപ്പുറം വായിക്കേണ്ട. ഇനി അഥവാ രാഷ്ട്രീയം ഉണ്ടേൽ തന്നെ എന്താ കുഴപ്പം? നമ്മുടെ സംവിധായകൻ സഖാവിനെതിരെ ഒരു ആരോപണം വന്നപ്പോൾ തന്നെ പാർട്ടി അദ്ദേഹത്തിന്റെ രാജി ആവശ്യപ്പെട്ടല്ലോ. അദ്ദേഹം മാന്യമായി പദവി ഒഴിയുകയും ചെയ്തു. അപ്പോൾ പിന്നെ എന്താണ് പ്രശ്നം?

ഇതുകേട്ടുകൊണ്ട് കടയിലേക്ക് വരുന്ന വൈദ്യര് വിഷയത്തിൽ ഇടപെടുന്നു.

വർക്കി - പ്രശ്നമുണ്ടല്ലോ... നിങ്ങടെ എം.എൽ.എയ്ക്കെതിരെ അല്ലേ കൂടുതൽ ആരോപണങ്ങളും വെളിപ്പെടുത്തലുകളും ഉള്ളത് എന്നിട്ടക്കാര്യത്തിൽ എന്തേ ഒന്നും മിണ്ടാട്ടമില്ല.

ഹംസ - അത് പിന്നെ... വെറും ആരോപണം മാത്രമല്ലേ ആയിട്ടുള്ളൂ.

വൈദ്യര് - അതേ... വെറും ആരോപണം മാത്രം. അതുതന്നെയല്ലേ നിങ്ങടെ വിഖ്യാത സംവിധായകനെതിരെയും ഉയർന്നത്. എന്നിട്ടദ്ദേഹത്തെ മാറ്റിയില്ലേ...