പ്രളയത്തിലും അമാവാസിയിലും വെളിച്ചം ഉമ്മൻചാണ്ടി

ഉമ്മൻചാണ്ടി ഒന്നാം ചരമദിനം ജൂലായ് 18

-  അഡ്വ. പി.എസ് ശ്രീകുമാർ

ഗോഡ്സെയുടെ വെടിയുണ്ടാക്കിരയായി, നമ്മുടെ രാഷ്ട്രപിതാവായ ഗാന്ധിജി ഒരു മാടപ്രാവിനെപ്പോലെ പിടഞ്ഞുവീണ് മരിച്ചപ്പോൾ, ലോകം കണ്ട ഏറ്റവും പ്രതിഭാശാലിയായ ശാസ്ത്രജ്ഞരിൽ ഒരാളായ ആൽബർട്ട് ഐൻസ്റ്റയിൽ അദ്ദേഹത്തെക്കുറിച്ചു പറഞ്ഞ ഒരു വാചകമുണ്ട്. “മജ്ജയും മാംസവുമുള്ള ഇതുപോലൊരു മനുഷ്യൻ ഈ ഭൂമിയിൽ ജീവിച്ചിരുന്നെന്ന് ഇനി വരുന്ന തലമുറക്ക് വിശ്വസിക്കാൻ പ്രയാസമായിരിക്കും'. ആധുനിക ഇന്ത്യയിൽ, ഈ വാചകം ഏറ്റവും അന്വർത്ഥമാക്കിയ ഒരു നേതാവാണ് മുൻ മുഖ്യമന്ത്രി ഉമ്മൻചാണ്ടി. അതുകൊണ്ടാണ്, അദ്ദേഹത്തിന്റെ ശവമഞ്ചവും വഹിച്ചുകൊണ്ട് 2023 ജൂലൈ 18-ന് തിരുവനന്തപുരത്തെ പുതുപ്പള്ളി ഹൌസിൽ നിന്നും പുതുപ്പള്ളിയിലേക്കുള്ള വിലാപ യാത്രയിൽ ഉടനീളം ജനസഹസ്രങ്ങൾ തൊണ്ടപൊട്ടുമാറ് ഉച്ചത്തിൽ വിളിച്ചത്.

"ഇല്ലാ ...ഇല്ലാ .....മരിച്ചിട്ടില്ല

ഉമ്മൻചാണ്ടി മരിച്ചിട്ടില്ല

ജീവിക്കുന്നു ഞങ്ങളിലൂടെ"

കാരുണ്യത്തിന്റെ നിലക്കാത്ത പ്രവാഹമായിരുന്നു ഉമ്മൻചാണ്ടി എന്ന നേതാവ്. അധികാരം ഉള്ളപ്പോഴും ഇല്ലാത്തപ്പോളും, അദ്ദേഹം ജനങ്ങൾക്കു നടുവിൽ, അവരുടെ പ്രശ്നങ്ങൾ കേട്ടും പരിഹരിച്ചും അവരിൽ ഒരാളായി ജീവിച്ചു. സ്നേഹിച്ചതുപോലെ, ദേഷ്യപ്പെടാനും, ശാസിക്കാനും അദ്ദേഹം ജനങ്ങൾക്ക് സ്വാതന്ത്ര്യം നൽകി. സാധാരണക്കാരെ സംബന്ധിച്ചിടത്തോളം ഏതു അർദ്ധരാത്രിയിലും വീട്ടിലോ, അദ്ദേഹം താമസിക്കുന്നിടത്തോ ഇടനിലക്കാരുടെ ആവശ്യമില്ലാതെ നേരിട്ട് ചെന്ന് കാണാനും, ഫോണിൽ വിളിക്കാനും, പ്രാപ്യനായ ഒരു നേതാവ് ഉമ്മൻചാണ്ടിയല്ലാതെ മറ്റൊരാൾ ഇന്ത്യൻ രാഷ്ട്രീയത്തിൽ ഇന്നില്ല.