പോലീസ് കോൺസ്റ്റബിൾ യൂണിഫോം അണിയാൻ ഒരുങ്ങാം

രണ്ട് ഘട്ടങ്ങളിലായി നടക്കുന്ന പരീക്ഷകൾ, ശാരീരിക യോഗ്യതാ പരിശോധന, ഫിസിക്കൽ എഫിഷ്യൻസി ടെസ്റ്റ്, വൈദ്യപരിശോധന എന്നിവയുടെ അടിസ്ഥാനത്തിലാണ് നിയമനം ലഭിക്കുക

- ഹർഷൻ

ആംഡ് പോലീസ് ബറ്റാലിയനുകളിൽ കോൺസ്റ്റബിൾ നിയമനത്തിനുള്ള വിജ്ഞാപനമായി. മികച്ച ശമ്പളവും മെച്ചപ്പെട്ട പ്രമോഷൻ സാധ്യതകളും കൊണ്ട് ആകർഷണീയമായ തസ്തികയാണിത്. സ്ത്രീകൾക്കും പുരുഷൻമാർക്കും വെവ്വേറെ തിരഞ്ഞെടുപ്പ് നടക്കുന്നതിനാലും പ്രത്യേക പ്രായപരിധിയിലുള്ളവർക്ക് മാത്രമായതിനാലും അപേക്ഷകർക്ക് നിയമനസാധ്യത കൂടുതലാണെന്ന സവിശേഷതയുമുണ്ട്.

പ്ലസ് ടു യോഗ്യത അടിസ്ഥാനമാക്കി പി.എസ്.സി. നടത്തുന്ന പരീക്ഷകളിൽ ഏറ്റവുമധികം പേർക്ക് നിയമനം കിട്ടുന്ന തസ്തിക കൂടിയാണിത്. സിവിൽ പോലീസ് ഓഫീസർ എന്നാണ് നിലവിൽ ഈ തസ്തികയുടെ പേര്. സീനിയർ സിവിൽ പോലീസ് ഓഫീസർ, എ.എസ്.ഐ.എസ്.ഐ. എന്നിങ്ങനെയാണ് തുടർന്നുള്ള പ്രമോഷനുകൾ.

ശമ്പളവും അലവൻസും

മറ്റ് സർക്കാർ ജോലികളെ അപേക്ഷിച്ച് കൂടുതൽ അലവൻസുകൾ പോലീസ് ഉദ്യോഗസ്ഥർക്ക് ലഭിക്കുന്നുണ്ട്. ഡേ ഓഫ് അലവൻസ്, റിസ്സ് അലവൻസ്, പെർമനന്റ് ട്രാവലിങ് അലവൻസ് എന്നിവ ഇതിൽ എടുത്തുപറയേണ്ടവയാണ്. ഇതിന് പുറമേ 5,000 രൂപയോളം പ്രതിവർഷം യൂണിഫോം അലവൻസും ലഭിക്കും. നിലവിൽ പോലീസ് കോൺസ്റ്റബിളിന്റെ ശമ്പളസ്കെയിൽ 31,100-66,800 രൂപ എന്നതാണ്. അടിസ്ഥാന ശമ്പളത്തോടൊപ്പമുള്ള ഡി.എ., എച്ച്.ആർ.എ. എന്നിവയും മറ്റ് അലവൻസുകളും കൂടിച്ചേരുമ്പോൾ 38,000 രൂപയിലേറെ തുടക്കത്തിൽ ലഭിക്കും. സർക്കാർ ജീവനക്കാർക്ക് ലഭിക്കാനുള്ള ഡി.എ.കുടിശ്ശിക കൂടി ആവുമ്പോൾ 41,000 രൂപയ്ക്കും മേലെയാവും തുടക്കശമ്പളം.

9 മാസത്തോളം നീളുന്ന ട്രെയിനിങ് കാലയളവിൽ മുൻപ് അടിസ്ഥാന ശമ്പളം മാത്രം നൽകുന്നതായിരുന്നു രീതി. എന്നാൽ, ഇപ്പോൾ ഈ കാലയളവിൽ മുഴുവൻ ശമ്പളവും ലഭിക്കുന്നു.

ഉയരങ്ങളിലെത്താൻ എളുപ്പം