இந்தியர்களுடன் இஸ்ரேல் கப்பல் சிறைபிடிப்பு

ஈரான் நடவடிக்கையால் பதற்றம்

இந்திய மாலுமிகள் 17 பேருடன் பயணித்த சரக்குக் கப்பலை ஈரானின் இஸ்லாமிய புரட்சிக் காவல் படை சனிக்கிழமை சிறைபிடித்தது. இஸ்ரேல், ஈரான் இடையே மோதல் ஏற்பட்டுள்ள சூழலில், அந்தக் கப்பலுக்கு இஸ்ரேலுடன் தொடர்புள்ளதால், அதை ஈரான் படையினர் சிறைபிடித்துள்ளனர்.

உலகின் மத்திய கிழக்குப் பகுதியில் இஸ்ரேல், ஈரான், லெபனான் உள்ளிட்ட நாடுகள் இடம்பெற்றுள்ளன. இந்நிலையில், இஸ்ரேல் பாலஸ்தீனத்தின் காஸா பகுதியில் ஆட்சிபுரிந்த ஹமாஸ் படை இடையிலான போரால் மத்திய கிழக்குப் பகுதியில் பதற்றம் தொடர்கிறது.

இஸ்ரேலும் லெபனானும் எல்லைகளைப் பகிர்ந்துகொள்ளும் நிலையில், ஹமாஸுக்கு ஆதரவாக எல்லைப் பகுதிகளில் லெபனானின் ஹிஸ்புல்லா படையினர் இஸ்ரேல் மீது தாக்குதலில் ஈடுபட்டுள்ளனர். இதேபோல ஹமாஸுக்கு ஆதரவாக செங்கடல் வழியாக இஸ்ரேலுக்குச் செல்லும் சரக்குக் கப்பல்கள் மீது தாக்குதல் நடத்தப்படும் என்று கூறி, அந்த வழியாகச் சென்ற பல கப்பல்கள் மீது யேமன் நாட்டின் ஹூதி கிளர்ச்சியாளர்கள் தாக்குதல் நடத்தினர். எனினும் ரமலான் பண்டிகை நோன்பு காரணமாக அண்மைக் காலமாக அவர்களின் தாக்குதல் குறைந்துள்ளது. ஹிஸ்புல்லா மற்றும் ஹூதிக்களுக்கு ஈரான் ஆதரவு உள்ளது.

இதேபோல ஈரான் ஆதரவு பெற்ற போராளிக் குழுக்கள், சிரியாவிலும் இராக்கிலும் இஸ்ரேலுக்கு ஆதரவு அளிக்கும் அமெரிக்க படைகளைக் குறிவைத்து தாக்குதல் நடத்தின.

இந்நிலையில், கடந்த ஏப்.1-ஆம் தேதி சிரியா தலைநகர் மாஸ்கஸில் உள்ள ஈரான் துணைத் தூதரகம் மீது வான்வழித் தாக்குதல் நடத்தப்பட்டது. இதில் 12 பேர் உயிரிழந்தனர். அவர்களில் ஈரானின் இஸ்லாமிய புரட்சிக் காவல் படையின் தளபதிகள் இருவரும் அடங்குவர்.