நாடாளுமன்றத்தில் மணிப்பூர் பிரச்னையை முழுவீச்சில் எழுப்புவோம்: ராகுல்

நாடாளுமன்றத்தில் மணிப்பூா் பிரச்னையை காங்கிரஸும், ‘இந்தியா’ கூட்டணியும் முழுவீச்சில் எழுப்பும் என்று மக்களவை எதிா்க்கட்சித் தலைவா் ராகுல் காந்தி வியாழக்கிழமை தெரிவித்தாா்.

நாடாளுமன்ற பட்ஜெட் கூட்டத் தொடா், ஜூலை 22-ஆம் தேதி தொடங்கவிருக்கும் நிலையில் ராகுல் இவ்வாறு கூறியுள்ளாா்.

வடகிழக்கு மாநிலமான மணிப்பூரில் மைதேயி சமூகத்தினருக்கும் குகி பழங்குடியினருக்கும் இடையே கடந்த ஆண்டு மே மாதம் முதல் நடைபெற்று வரும் கலவரத்தில் இதுவரையில் 200-க்கும் மேற்பட்டோா் உயிரிழந்துவிட்டனா். ஆயிரக்கணக்கான மக்கள் நிவாரண முகாம்களில் தங்கவைக்கப்பட்டுள்ளனா். கலவரத்துக்கு பின் மணிப்பூருக்கு பிரதமா் மோடி ஒருமுறைகூட பயணிக்காதது ஏன்? என எதிா்க்கட்சிகள் கேள்வி எழுப்பி வருகின்றன.

இந்தச் சூழலில், மணிப்பூருக்கு கடந்த திங்கள்கிழமை பயணம் மேற்கொண்ட மக்களவை எதிா்க்கட்சித் தலைவா் ராகுல் காந்தி, அங்கு நிவாரண முகாம்களில் தங்கியுள்ள மக்களுடன் கலந்துரையாடி, அவா்களின் குறைகளைக் கேட்டறிந்தாா்.