அரசின் குரலை ஒடுக்க எதிர்க்கட்சிகள் முயற்சி

பிரதமர் மோடி குற்றச்சாட்டு

அரசின் குரலை ஒடுக்க ஜனநாயக விரோத முயற்சியில் எதிர்க்கட்சிகள் ஈடுபட் டதாக நரேந்திர மோடி குற்றஞ்சாட் டினார்.

நாடாளுமன்ற பட்ஜெட் கூட்டத் தொடர் திங்கள்கிழமை தொடங்கியது. இதையொட்டி, நாடாளுமன்றத்துக்கு வெளியே பிரதமர் மோடி செய்தியாளர்களுக்கு பேட்டி அளித்தார். அப்போது அவர் கூறியதாவது: செவ்வாய்க்கிழமை தாக்கல் செய்யப்பட உள்ள மத்திய பட்ஜெட், அடுத்த ஐந்து ஆண்டுகளில் நாடு மேற்கொள்ள வேண்டிய பயணத்தின் திசையைத் தீர்மானிக்கும்.

மேலும், வரும் 2047-இல் நாட்டை வளர்ந்த பாரதமாக்குவதற்கான கனவை நிறைவேற்றுவதற்கான அடித்தளத்தையும் இந்த பட்ஜெட் அமைக்கும்.

அனைத்து எம்.பி.க்களுக்கும், அவர்கள் எந்தக் கட்சியைச் சேர்ந்தவர்களாக இருந்தாலும் ஒன்றை கூறிக் கொள்ள விரும்புகிறேன்.

இந்த ஆண்டு ஜனவரி மாதம் முதல் நாம் தேர்தல் களத்தில் போராடினோம். நாம் கூறவிரும்பியதை மக்களிடம் எடுத்துக் கூறினோம். சிலர் வழியைக் காட்டினர்; சிலர் தவறாக வழிநடத்தினர். ஆனால், அந்தக் காலகட்டம் தற்போது முடிந்துவிட்டது.