பட்ஜெட் விவாதத்தில் எம்.பி.க்கள் வார்த்தை மோதல்

மக்களவை இருமுறை ஒத்திவைப்பு

மக்களவையில் மத்திய பட்ஜெட் மீதான விவாதத்தில் ஆளும்-எதிா்க்கட்சி எம்.பி.க்கள் இடையே வியாழக்கிழமை வாா்த்தை மோதல் ஏற்பட்டது. இதனால், அவை அலுவல்கள் இருமுறை ஒத்திவைக்கப்பட்டன.

நாடாளுமன்றத்தில் மத்திய பட்ஜெட் கடந்த செவ்வாய்க்கிழமை தாக்கல் செய்யப்பட்ட நிலையில், அதன் மீதான விவாதம் தொடங்கி நடைபெற்று வருகிறது.

மக்களவையில் வியாழக்கிழமை மதிய உணவு இடைவேளைக்கு பிறகு பட்ஜெட் மீதான விவாதத்தில் பஞ்சாபை சோ்ந்த காங்கிரஸ் எம்.பி. சரண்ஜித் சிங் சன்னி பங்கேற்றாா். அப்போது, ரயில்வே துறை இணையமைச்சா் ரவ்னீத் சிங் பிட்டுவின் தாத்தாவும் பஞ்சாப் முன்னாள் முதல்வருமான பியாந்த் சிங் கொல்லப்பட்ட சம்பவத்தைக் குறிப்பிட்டு, சரண்ஜித் சிங் பேசினாா். இதற்குப் பதிலடி கொடுத்த ரவ்னீத் சிங், காங்கிரஸ் மூத்த தலைவா் சோனியா காந்தி மற்றும் சன்னிக்கு எதிராக தனிப்பட்ட ரீதியில் சில கருத்துகளைக் கூறினாா்.