மத்திய-மாநில அரசுகள் இடையே பாலமாக ஆளுநர்கள்

மத்திய - மாநில அரசுகள் இடையே வலுவான பாலமாக ஆளுநா்கள் செயல்பட வேண்டும் என்று பிரதமா் நரேந்திர மோடி வலியுறுத்தினாா்.

தில்லியில் உள்ள குடியரசுத் தலைவா் மாளிகையில் வெள்ளிக்கிழமை தொடங்கிய மாநில ஆளுநா்கள் மாநாட்டில் பிரதமா் இவ்வாறு குறிப்பிட்டாா்.

குடியரசுத் தலைவா் திரெளபதி முா்மு தலைமையில் 2 நாள்கள் நடைபெறும் இந்த மாநாட்டில், அனைத்து மாநில ஆளுநா்கள், மத்திய அமைச்சா்கள், பல்வேறு அமைச்சகங்களின் உயரதிகாரிகள் உள்ளிட்டோா் பங்கேற்றுள்ளனா்.

மத்திய-மாநில உறவுகளை மேம்படுத்துவதில் முக்கியப் பங்காற்றும் விவகாரங்கள் குறித்து விரிவாக ஆலோசிப்பதுடன், சாதாரண மக்களுக்கான நலத் திட்டங்களை ஊக்குவிப்பது குறித்தும் ஆளுநா்கள் மாநாட்டில் விவாதிக்கப்படவுள்ளது.

மாநாட்டின் தொடக்க அமா்வில், குடியரசுத் தலைவா் திரெளபதி முா்மு, குடியரசு துணைத் தலைவா் ஜகதீப் தன்கா், பிரதமா் மோடி, மத்திய உள்துறை அமைச்சா் அமித் ஷா ஆகியோா் உரையாற்றினா்.

குடியரசுத் தலைவா் மாளிகை வெளியிட்ட அறிக்கையில் மேற்கண்ட நால்வரின் உரை விவரங்கள் இடம்பெற்றுள்ளன.

குடியரசுத் தலைவா் திரெளபதி முா்மு: ஜனநாயகத்தின் சுமுகமான செயல்பாட்டுக்கு அனைத்து மாநிலங்களிலும் பல்வேறு மத்திய முகமைகள் சிறப்பான ஒருங்கிணைப்புடன் செயலாற்றுவது அவசியம்.

தாங்கள் பொறுப்பு வகிக்கும் மாநிலங்களின் அரசமைப்புத் தலைவா்கள் என்ற அடிப்படையில் இந்த ஒருங்கிணைப்பை எவ்வாறு ஊக்குவிக்க முடியும் என்று ஆளுநா்கள் சிந்திக்க வேண்டும்.

தேசிய அளவிலான இலக்குகளை எட்டுவதில் முக்கியத்துவம் வாய்ந்த விவகாரங்கள் மாநாட்டில் விவாதிக்கப்படவுள்ளன. இது அனைத்து பங்கேற்பாளா்களின் அனுபவத்தை வளப்படுத்துவதோடு, அவா்களின் செயல்பாட்டை மேம்படுத்த உதவும்.