தேசிய கல்விக் கொள்கை: முதல்வர், மத்திய அமைச்சர் கருத்து மோதல்

தேசிய கல்விக் கொள்கை தொடா்பாக முதல்வா் மு.க.ஸ்டாலின், மத்திய கல்வி அமைச்சா் தா்மேந்திர பிரதான் இடையே சமூகவலைதளத்தில் கருத்து மோதல் ஏற்பட்டது.

மத்திய அரசின் சமக்ர சிக்ஷா என்ற ஒருங்கிணைந்த பள்ளிக் கல்வித் திட்டத்தின் கீழ், நிகழாண்டு தமிழகத்துக்கு நிதி ஒதுக்கீடு செய்ய ஒப்புதல் வழங்கப்பட்டது. எனினும் தேசிய கல்விக் கொள்கையின் சில விதிகளை தமிழக அரசு ஏற்கவில்லை. குறிப்பாக, தமிழகத்தில் இருமொழிக் கொள்கை பின்பற்றப்படும் நிலையில், தேசிய கல்விக் கொள்கையில் இடம்பெற்றுள்ள மும்மொழிக் கொள்கையை பி.எம்.ஸ்ரீ பள்ளிகளில் அமல்படுத்துவதில் தமிழக அரசு உடன்படவில்லை. இதன் காரணமாக சமக்ர சிக்ஷா திட்டத்தின் கீழ் வழங்கப்பட வேண்டிய ரூ.573 கோடி முதல் தவணைத் தொகையை மத்திய அரசு நிறுத்திவைத்துள்ளது.