விமான சாகச நிகழ்வு: உயிரிழந்த 5 பேர் குடும்பத்துக்கு தலா ரூ.5 லட்சம்

சென்னையில் விமான சாகச நிகழ்வைக் காண வந்து உயிரிழந்த 5 பேர் குடும்பத்துக்கு தலா ரூ.5 லட்சம் வழங்கப்படும் என முதல்வர் மு.க.ஸ்டாலின் திங்கள்கிழமை அறிவித்துள்ளார்.

- 

கடும் வெயில், மருத்துவக் காரணங்களாலேயே 5 பேர் இறந்ததாகவும், அடுத்த முறை இதுபோன்ற பெரிய நிகழ்ச்சிகளை ஏற்பாடு செய்யும்போது அவற்றில் கூடுதல் கவனமும் ஏற்பாடுகளும் செய்யப்படும் எனவும் அவர் தெரிவித்துள்ளார். சென்னை மெரீனா கடற்கரையில் விமானப் படையின் 92-ஆவது ஆண்டு விழா சாகச நிகழ்ச்சி ஞாயிற்றுக்கிழமை நடைபெற்றது. காலை 11 மணிக்கு தொடங்கிய இந்நிகழ்ச்சியைக் காண மெரீனா கடற்கரை மற்றும் சுற்றுப்புற பகுதியில் லட்சக்கணக்கான மக்கள் திரண்டனர். மக்கள் ஒரே இடத்தில் திரண்டதால் நேரிட்ட கூட்ட நெரிசலாலும், வெயிலால் ஏற்பட்ட நீர்ச்சத்து இழப்பு காரணமாகவும் ஐந்து பேர் உயிரிழந்தனர். 240-க்கும் மேற்பட்டோர் மயங்கி விழுந்தனர். அவற்றில் 93 பேர் மருத்துவமனைகளில் அனுமதிக்கப்பட்டனர்.