குழந்தைகள் நலனைக் கொண்டாடுவோம்

வளர்ந்துவரும் நாடுகளில் புத்தாயிரத்தின் தொடக்கம் அதாவது 2000-ஆம் ஆண்டு வரை சாதாரணமான வயிற்றுப் போக்கால் ஆண்டுக்கு லட்சக்கணக்கான குழந்தைகள் இறந்துகொண்டிருந்தன.

நன்கு கொதிக்கவைக்கப்பட்டு ஆறிய தண்ணீரில் ஒரு சிட்டிகை அளவு உப்பைச் சேர்த்து உருவாக்கப்பட்ட கரைசலே பல குழந்தைகளின் உடலில் நீர்ச்சத்தை தக்கவைத்து உயிர் காத்திருக்கும். ஆனால் இந்த விழிப்புணர்வு ஏற்பட ஆண்டுகள் பலவாகின.

தற்போது உருவாகியுள்ள சுத்தமான தண்ணீர் குறித்த விழிப்புணர்வு இந்த அவலநிலையைப் போக்கி குழந்தைகள் இறப்புவிகிதத்தை வெகுவாக குறைத்துள்ளது.

ஆனால் சத்தான உணவு குறித்த கனவு இன்னும் நிறைவேறியபாடில்லை.

எந்த நாடாயிருப்பினும் உலக அளவில் குழந்தைகள் பெற்றோரின் பொருளாதாரச் சூழலே குழந்தைகளின் உடல் நலன், மனநலன் ஆகியவற்றின் சமச்சீர் தன்மையை தீர்மானிக்கின்றது. ஆனால் பொருளாதாரச் சமநிலை ஏற்படும் வரை குழந்தைகளின் ஆரோக்கியம் குறித்து வாளாயிருக்க இயலாது.

அண்மையில் யூனிசெப் நிறுவனம் 100 நாடுகளில் வெவ்வேறு வருவாய்ப் பிரிவில் உள்ள குடும்பத்தினரிடையே ஓர் ஆய்வு நடத்தியது. இந்த ஆய்வின்படி, 5 வயதுக் கும் குறைவான குழந்தைகளில், 18.1 கோடி குழந்தைகள் உணவு தொடர்புள்ள வறுமையில் இருப்பதாக தெரிவிக்கிறது. இது உலக அளவில் இருக்கும் 4 குழந்தைகளில் ஒருவர் என்றும் கணக்கில் கொள்ளலாம்.