வைஷ்ணவ தேவி கோயில் ரோப் கார் திட்டத்துக்கு எதிராக மூன்றாவது நாளாக போராட்டம்

ஜம்மு-காஷ்மீரில் உள்ள வைஷ்ணவ தேவி கோயிலுக்கு செல்வதற்கான ரோப் கார் திட்டத்தை அமல்படுத்துவதை எதிர்த்து மூன்றாவது நாளாக ஞாயிற்றுக்கிழமையும் போராட்டம் நடைபெற்றது.

ஜம்மு-காஷ்மீரின் ரியாசி மாவட்டத்தில் கட்ரா நகரில் திரிகூட மலை உச்சியில் பிரபலமான வைஷ்ணவ தேவி கோயில் அமைந்துள்ளது.

இந்த மலையின் அடிவாரத்தில் இருந்து கோயில் அமைந்துள்ள உச்சி வரை 12 கி.மீ. தொலைவுக்கு பக்தர்கள் சென்று வர ரோப் கார் திட்டத்தை ரூ.250 கோடி செலவில் அமல்படுத்த உள்ளதாக கோயில் நிர்வாகம் அண்மையில் அறிவித்தது.

இந்த நிலையில், இத்திட்டம் அமல்படுத்தப்பட்டால் தங்களின் வசிப்பிடத்துக்கு பாதிப்பு ஏற்படும் எனக் கூறி அப்பகுதியைச் சேர்ந்த மக்கள் எதிர்ப்பு தெரிவித்துள்ளனர்.