நெல்லை அருகே கொட்டப்பட்ட மருத்துவக் கழிவுகள்: திரும்ப எடுத்துச்சென்ற கேரள அரசு

திருநெல்வேலி அருகே நடுக்கல்லூர் சுற்றுவட்டார பகுதிகளில் கொட்டப்பட்ட கேரள மருத்துவக் கழிவுகள் பசுமைத் தீர்ப்பாயத்தின் உத்தரவின்படி, 18 லாரிகளில் கேரள மாநிலம் சார்பில் ஞாயிற்றுக்கிழமை திரும்ப எடுத்துச்செல்லப்பட்டது.

திருநெல்வேலி அருகேயுள்ள நடுக்கல்லூர், பழவூர், கொண்டாநகரம் சுற்றுவட்டார மேய்ச்சல் புறம்போக்கு நிலங்கள், பட்டா நிலங்கள், நீர்நிலைகளில் நூற்றுக்கணக்கான மூட்டைகளில் மருத்துவக் கழிவுகள் கொட்டப்பட்டதாக பொதுமக்கள் புகார் தெரிவித்தனர். அவை, திருவனந்தபுரத்தில் உள்ள மண்டல புற்றுநோய் மையத்தில் இருந்து கொண்டு வரப்பட்டதற்கான ரசீதுகளும் கைப்பற்றப்பட்டன.

4 பேர்கைது: இதுதொடர்பாக சுத்தமல்லி போலீஸார் வழக்குப்பதிந்து, கேரள கழிவுகளை சுத்தமல்லி பகுதியில் கொட்டி தீயிட்டு எரிக்க உதவியதாக மனோகர், மாயாண்டி ஆகியோரை போலீஸார் கைது செய்தனர். தொடர்ந்து கழிவுகளை ஏற்றி வர பயன்படுத்தப்பட்ட லாரியை சேலம் மாவட்டத்தில் போலீஸார் பறிமுதல் செய்தனர். பின்னர் லாரி ஓட்டுநரான சேலம் மாவட்டம், இலத்தூர், காளியம்மன் கோயில் தெருவைச் சேர்ந்த செல்லதுரை (37), மருத்துவக் கழிவுகளை அழிக்கும் தனியார் நிறுவனத்தைச் சேர்ந்த கேரள மாநிலம், கண்ணூர் மாவட்டம், இடாவேலியைச் சேர்ந்த ஜித் தன் ஜேர்ச் (40) ஆகியோரை போலீஸார் கைது செய்தனர்.