ஆட்சியாளர்கள் மீது ஆதாரங்களுடன் காங்கிரஸ் தலைமையில் ஐனாதிபதியிடம் புகார்

முன்னாள் முதலமைச்சர் நாராயணசாமி தகவல்

புதுச்சேரி முன்னாள் முதலமைச்சர் நாராயணசாமி நேற்று நிருபர்களிடம் கூறியதாவது: இந்தியா வளர்ந்து வரும் நாடு என சொல்லிவிட்டு 80 கோடி மக்களுக்கு தலா ஐந்து கிலோ இலவச அரிசி திட்டத்தை நிறைவேற்றி வருகின்றனர். ஒரு நாடு வளர்ந்து வருகிறது என்றால், இலவச அரிசி திட்டத்தை தொடர்ந்து நடைமுறைப்படுத்த வேண்டிய அவசியம் இல்லை. 80 கோடி பேருக்கு இலவச அரிசி தருவதற்கு மோடி இன்னும் ஆண்டுகள் நீட்டித்துள்ளார். காங்கிரஸ் ஆட்சியில் 19 சதவீதமாக இருந்த ஏழைகள், தற்போது 27.3 சதவீதமாக உயர்ந்துள்ளது. இது பொருளாதார வீக்கத்தையே பறைசாற்றுகிறது.

தமிழக ஆளுநர் ரவி சர்ச்சைக்குரிய பிரச்சினைகளை முன்வைத்து தமிழர்களை அவமதித்து, தமிழக அரசுக்கு தினந்தோறும் தொல்லை அளித்து வருகிறார். ஆளுநர் ரவியை மத்திய அரசு திரும்ப பெற, முதலமைச்சர் ஸ்டாலின் வலியுறுத்துகிறார். மத்திய அரசின் கைப்பாவையாக இருந்து பிரதமருக்கு சேவகம் செய்கிறாரே தவிர, தமிழக வளர்ச்சிக்கோ, மக்கள் உணர்வுக்கோ மதிப்பளிக்கவில்லை.

ஆளுநர் பாரபட்சமாக செயல்படுவது கண்டிக்கத்தக்கது. அதனால் ஆளுநர் ரவியை மத்திய அரசு திரும்ப பெற வேண்டும். புதுவையில் கோவில் நிலங்கள் தொடர்ந்து கபளீகரம் செய்யப்படுகிறது.

காரைக்கால் கோவில் விவகாரத்தில் முக்கியமாக குற்றம் சாட்டப்பட்டவர் வெளியில் சுதந்திரமாக சுற்றி வருகிறார். கோவில் நிலத்தை பட்டா மாற்றி விற்பது சகஜமாகிவிட்டது. இதற்கு கடுமையான நடவடிக்கை தேவை.