வேளச்சேரி மேம்பாலத்தில் 2-ஆவது நாளாக அணிவகுத்து நிற்கும் கார்கள்!

சென்னையில் கனமழை பெய்து வரும் நிலையில், பாதுகாப்பு காரணமாக வேளச்சேரி மேம்பாலத்தில் 2வது நாளாக கார்கள் அணிவகுத்து நிறுத்தி வைக்கப்பட்டுள்ளது.

கடந்த ஆண்டு டிசம்பரில், மிக்ஜாம் புயல் காரணமாக வரலாறு காணாத கனமழை சென்னையில் பெய்தது. இடைவிடாது கொட்டிய இந்த கனமழையால் சென்னை நகரின் பெரும்பாலான பகுதிகளில் தண்ணீர் தேங்கி குளம்போல காட்சியளித்தது. தமிழக அரசு உரிய முன்னெச்சரிக்கை நடவடிக்கைகளை மேற்கொண்டாலும், ஒவ்வொரு முறையும் வெள்ளம், புயல் அபாயத்தின் போது சென்னை நீருக்குள் மூழ்குவது வழக்கம். கடந்த ஆண்டு வேளச்சேரியில் பெய்த கனமழையால் சுமார் 5,000-க்கும் மேற்பட்ட குடியிருப்பு பகுதிகளில் வெள்ளம் சூழ்ந்தது. மழை நீருடன் கழிவு நீர் சேர்ந்து வீடுகளுக்குள் புகுந்ததால் துர்நாற்றம் வீசுவதாக அப்பகுதி மக்கள் வேதனை தெரிவித்தனர்.