ગુજરાતમાં આગામી ૭૨ કલાક સુધી ‘આકાશી આફત'નો ખતરોઃ તંત્રને હાઈ એલર્ટ પર રખાયું

અમદાવાદ, ગાંધીનગર અને આસપાસના વિસ્તારો માટે શનિ-રવિ બહુ કપરા રહેશેઃ બે દિવસ ભારેથી અતિભારે વરસાદની હવામાન વિભાગની આગાહી

અમદાવાદ, શુક્રવાર

હવામાન વિભાગ દ્વારા રાજ્યમાં આજથી ભારે વરસાદની આગાહી કરવામાં આવી છે. વરસાદી સિસ્ટમ સક્રિય થતાં ગુજરાતમાં હવે ફરી વરસાદ જામશે. જેના કારણે આગામી ૭૨ કલાક ‘આકાશી આફત'નો ખતરો મંડરાશે. જોકે સરકાર પણ આફતને પહોંચી વળવા સજ્જ છે. તંત્ર પણ હાઈ એલર્ટ પર છે. આજથી રાજ્યમાં અતિભારે વરસાદ રહેશે. ખાસ કરીને સૌરાષ્ટ્ર, કચ્છ, ઉત્તર ગુજરાતમાં વરસાદી આફત વરસશે. જેના પગલે છ જિલ્લાને રેડ એલર્ટ પર જાહેર કરવામાં આવ્યા છે. હવામાન વિભાગ દ્વારા કરાયેલી આગાહી મુજબ, આજે સૌરાષ્ટ્ર કચ્છમાં ગાજવીજ સાથે હળવો વરસાદ પડશે. આ ઉપરાંત અમદાવાદ, ગાંધીનગર, સાબરકાંઠા, સુરેન્દ્રનગર અને રાજકોટમાં ગાજવીજ સાથે વરસાદ થવાની આગાહી કરવામાં આવી છે.