આપણું અમદાવાદ ૮૧ તળાવના વિકાસ સાથે હવે ‘લેક સિટી’ તરીકે આકાર લેશે

મુખ્યપ્રધાનનો મહત્ત્વપૂર્ણ નિર્ણયઃ રાજ્ય સરકાર હસ્તકનાં વધુ ૮૧ તળાવ મ્યુનિસિપલ તંત્રને ફાળવાયાંઃ લેક ડેવલપમેન્ટ પ્રોજેક્ટથી અમદાવાદના નાગરિકોનું ઈઝ ઓફ લિવિંગ વધારાશે

અમદાવાદ, સોમવાર

આપણું અમદાવાદ દેશમાં સ્માર્ટ સિટી તરીકે ઓળખ ધરાવે છે. અમદાવાદને દેશના સર્વપ્રથમ વર્લ્ડ હેરિટેજ સિટીની પણ પહેચાન મળી છે. એક સમયે કાપડની મિલોના કારણે આ શહેર દેશના માન્ચેસ્ટર તરીકે પણ પ્રસિદ્ધ હતું. ભારતની આઝાદીના આંદોલનમાં પૂજ્ય બાપુના સાબરમતી આશ્રમના કારણે પણ ગામેગામ અમદાવાદનું નામ ગૂંજતું હતું. સાબરમતી નદીના તટે વસેલું આ ઐતિહાસિક સ્થળ દેશનાં સૌથી વધુ ઝડપથી વિકસતાં જતાં શહેરોમાં અગ્રસ્થાને છે. જીવનધોરણનાં સ્તરોમાં એટલે કે સ્ટાન્ડર્ડ ઓફ લિવિંગમાં પણ અમદાવાદ દેશમાં આગળ પડતું સ્થાન ધરાવે છે. દેશ-વિદેશનાં લબ્ધપ્રતિષ્ઠિત સામયિકોની કવર સ્ટોરીમાં પણ અમદાવાદ તેની એક અથવા બીજા પ્રકારની વિશિષ્ટતાના કારણે ચમકતું રહે છે. હવે રાજ્ય સરકાર દ્વારા મ્યુનિ. તંત્રને સોંપાયેલાં વધુ ૮૧ તળાવના કારણે અમદાવાદ 'લેક સિટી' બનવા જઈ રહ્યું છે. દેશમાં અત્યાર સુધી ઉદયપુર લેક સિટી તરીકે મશહૂર છે પણ આગામી દિવસોમાં અમદાવાદ પણ ઉદયપુરની હરોળમાં જઈ બેસે તેવા ઉજ્જવળ સંજોગો ઊભા થયા છે.