વાઘની ઘટતી સંખ્યા: તંત્ર મૌન, અનેક સવાલો

વર્ષ ૨૦૧૯થી ૨૦૨૧ દરમિયાન લગભગ દર ત્રીજા દિવસે એક વાઘનું મોત નીપજ્યું છે

દેશમાં વાઘની સંખ્યામાં વધારાના સરકારના દાવા વચ્ચે એક ચોંકાવનારી વાત સામે આવી છે. કેન્દ્રીય પ્રધાન અશ્વિની ચૌબેએ સંસદમાં જણાવ્યું હતું કે, વર્ષ ૨૦૧૯થી ૨૦૨૧ દરમિયાન લગભગ દર ત્રીજા દિવસે એક વાઘનું મોત નીપજ્યું છે. આ રીતે આ ત્રણ વર્ષોમાં કુલ ૩૨૯ વાઘ મોતનાં મુખમાં ધકેલાઈ ચૂક્યા છે. આ આંકડા એ વાતની સાબિતી પૂરે છે કે, વાઘનાં સંરક્ષણની દિશામાં સરકાર દ્વારા કરવામાં આવી રહેલા પ્રયાસો અપૂરતા છે. આ વર્ષની શરૂઆતમાં કેન્દ્રીય નાગરિક ઉડ્ડયન પ્રધાન જ્યોતિરાદિત્ય સિંધિયાએ જાહેરાત કરી હતી કે, રાજસ્થાનના રણથંભોરથી લઈને મધ્યપ્રદેશના પન્ના સુધી ‘વાઈલ્ડ લાઈફ કોરિડોર’ બનાવવામાં આવશે.